Gobierno di Aruba ta tumando medidanan di precaucion necesario contra Coronavirus. Minister di Salud Publico, Turismo y Deporte, Dangui Oduber, hunto cu Minister di Husticia a tuma e decision pa rekeri di tur persona cu ta sali for di China cu kier bin Aruba, cu nan mester tin un declaracion medico cu nan NO ta contagia cu Coronavirus sino lo no admiti nan na Aruba!
Di e forma aki lo ta obligatorio pa pasaheronan cu nan biahe ta origina for di China, pa haci un checkup medico prome cu nan subi avion. Gobierno lo tin mas informacion den un siguiente relato cu lo sali dentro di poco.
E virusnan yama “Corona” ta un grupo di virus cu ta causa enfermedad den bestianan y specialmente parhanan. Cerca hende, e virus ta causa mayoria biaha infeccionnan respiratorio, den forma di griep y keintura, pero e enfermedadnan raro aki manera SARS, MERS y Coronavirus por ta fatal! No tin vacuna of remedi aproba pa cura of preveni e enfermedad ainda.
E virus, a lanta cabes desde dia 1 di december 2019, pues tin dos luna y 1 dia activo. A descubri e prome casonan na Wuhan, Hubei na China. Te cu awor, tin un total di 14.642 casi confirma y a cobra 305 bida. Tin un total di 27 teritorionan afecta pa e enfermedad aki.
