Partido MPB a hiba un campaña diferente segun su lider Hennyson Thielman. Nan a enfoca riba trece hopi informacion y no mucho pegament’i bandera manera e partidonan tradicional. Pa MPB ta importante pa por a splica e pueblo di nan plan; kico nan tin pensa di haci y con lo hacie.
A combersa cu e lider politico na momento cu el a bay deposita su voto di confiansa. Nan kier mira un cambio den politica na Boneiro. E forma di critica otro formal, bati otro tin cu keda pa pasado. Thielman tin bon sentimento p’e eleccion aki, mirando kico tur nan a haci y kico nan tin pensa di bay haci den futuro, si dado caso nan ricibi e sosten necesario.
Nan a traha cuater aña y e carteranan cu nan a maneha por mira un adelanto, sinembargo ora ta papia di infrastructura of vivienda pa pueblo, tin espacio pa mehoracion y ey ta caminda cu nan lo enfoca sigur e proximo añanan nos dilanti. E parti di tereno, e pueblo tin hopi aña ta wardando pa keda cla cu un pida tereno pa sea desaroya nan cas of negoshi. Pa goberna cu un solo partido, ta necesario cinco asiento di nuebe.
MPB ta enfoca riba e cinco asientonan aki pero no ta descarta cu lo ta habri pa traha cu otro partidonan pa un coalicion. Si dado caso nan bay traha den coalicion, MPB lo exigi e cartera di infrastructura pa mehora henter e pais y pa saca mas hopi tereno posibel p’asina pueblo y comerciante por desaroya riba nan. MPB ta para cla pa por goberna Boneiro pa e proximo añanan nos dilanti.
