Directiva di Dutch Caribbean Nature Alliance (DCNA) ta reuni cada seis luna y e siman aki nan a reuni na Aruba. Den DCNA organisacionnan di parke natural di tur 6 isla Caribense ta conecta cu otro, incluyendo Hulanda. Parke Nacional Arikok tabatin e honor di ricibi e reunion e biaha aki.

Den e reunion a palabra entre otro tocante desaroyo pa sigui enforsa e intercambio di experticio entre e parkenan, recauda fondo pa actividadnan uni y recuperacion di Sint Maarten, Saba y Sint Eustasius. Tambe a elabora tocante plannan pa maneha problemanan cu ta afecta ful Caribe,  manera e yerba di sargasso of animalnan invasivo manera e boa y lionfish.

Despues di e reunionnan Gobernador, Minister-Presidente y Minister di Enseñansa, Ciencia y Desaroyo Sostenibel tambe tabata presente pa un recepcion cu DCNA y diferente invitadonan.

Otro aña lo continua cu tur e palabracionnan durante e proximo reunion na Sint Maarten den luna di April.

 

Comments

comments