Diabierna ultimo a tuma luga e final di Paranda di Balashi, e biaha aki na Urataca Center na Santa Cruz. E evento a resulta masha exitoso compara cu tur añanan anterior, a kibra tur record. Ta pa 10 siman largo, tur diabierna, a presenta den diferente bario y bar na Aruba.
Aña 2019 a bay mas cu bon cu Balashi
Rowald Werleman, Beer Ambassador di Balashi, a gradici tur esunnan cu a join nan tur diabierna pa e diferente Parandanan di Balashi. Esaki ta e clausura pa loke ta trata Paranda di Balashi, pero siguramente e actividadnan ta continua. Pa otro siman caba lo tin un otro actividad, tambe por menciona dia 31 di december. Pero keda pendiente pa demas informacion riba esaki.
Aña no a bay sin reto
Segun Werleman e aña aki tabata tin su retonan cun’e. Pa loke ta trata Coca Cola por ehempel, tabatin hopi incertidumbre pa loke lo bay pasa cu e sugar tax. Pero a haya un bon noticia cu esaki no lo tuma luga. Tabatin un aumento di accijns imponi riba hard liquor. Cerbes no a haya esaki. Un aña challenging pero hopi positivo si y mirando 2020, e lo bay ta mas positivo siguramente.
Carnaval 2020
Fuera di esey, Werleman a splica cu pa loke ta carnaval, lo switch e rolnan un poco. Nan lo bay enfoca mas riba e cerbes Chill. Siguramente durante e temporada aki Chill lo bay ta sumamente activo. Manera por a nota, a enfoca mas riba e celebracion di 20 aña di cerbes Balashi. Awo pa Carnaval 2020 lo focus riba Chill. Lo tin diferente actividad rond di kavel cu ta tuma luga den carnaval 66.
Hopi banda hopi ambiente
Di parti di Balashi, ta gradici tur esunnan cu a participa e aña aki. Siguramente un gradicimento pa Grupo di Betico, Rincon Boyz, N’ Fuzion, Tsunami, D’licious, Buleria y Robert Jeand’or. Un palabra di gradicimento pa e 10 simannan largo aki cu a yuda pa trece actividadnan den e diferente barionan di Aruba. Loke ta haci gerencia contento ta pa mira e publico disfruta di nos producto local, Werleman a comenta.
Un aña nobo di Paranda di Balashi
E team di Balashi a haci un tremendo trabao e aña aki atrobe. Obviamente sin e fanaticonan, sin e audiencia, e no por ta mesun exitoso, segun Eddie de Veer, CEO di MetaCorp. El a conclui bisando cu e no tin nada di keha, al contrario, e tin hopi di elogia. No solamente di e pueblo cu a asisti na e actividadnan, pero tambe di e team na Balashi, cu a traha incansablemente pa logra e metanan aki.
