Den e ultimo conferencia di prensa di ELMAR NV, director interino Albertico Koolman a papia di e molester y gasto cu dañonan causa na pa’li luznan ta trece cune. Pa e motibo aki ta pidi hopi cautela principalmente den fin di aña ora cu ta tira klapchi.
Practicamente tur dia personal di ELMAR ta atende cu un of otro problema relaciona cu palonan di luz daña. E director a splica cu tur esaki ta trece basta gasto cun’e.
E gastonan aki ta varia. Por ehempel un pal’I luz riba Sasaki ta trece menos gasto cun’e. Pero si e tin transformer riba dje, e ta costa miles y miles di florin.
Pa e motibo aki e director a haci un apelacion principalmente awo cu ta den temporada di Pasco, corda no tira klapchi bou di un luz of cerca di e palo, pasobra e klapchi por dal den e waya, tin biaha di alta tension, y tira esaki abou. E ta crea hopi molester pa e casnan conecta riba e palo aki.
Informacion acumula ta mustra cu e gastonan di dal cu un auto den palo di luz por costa di algun mil florin te cu miles y miles di florin. E gastonan menor por core kisas den mas o menos 7 mil florin. Pero si un automobilista dal den uno cu transformer, ta hopi placa. No solamente pa drecha e palo di luz aki cu ta dura algun ora, pero tambe pasobra mester tene cuenta cu e bario ta keda algun ora sin coriente.
Mester paga personal tin biaha “overtime” of si ta dianan di fiesta mester paga extra. Pero si e bario no ta uza coriente, ELMAR ta perde di gana. Tur esaki ta wordo poni riba e cuenta di gasto. Facilmente daño causa riba un palo di luz cu transformer por yega of surpasa 40 mil florin. P’esey chauffeurnan maneha bon y evita di dal den palo di luz pa no haya un gasto extra, mas ainda si e auto cu a causa e accidente no ta segura.
