Recientemente Cas di Cultura, Aruba su teatro y plataforma cultural, a bira miembro di e prestigioso “Vereniging van Schouwburg- en Concertgebouwdirecties” (VSCD). VSCD ta e asociacion profesional di establecimento di teatro y concierto na Hulanda. Desde 1947 e asociacion aki ta traha pa establece un posicion fuerte pa e sector di arte di tarima na Hulanda y den Reino Hulandes riba tereno financiero, politico y denter di comunidad en general.
Como organisacion cu ta trahando den e industria di arte y cultura, VSCD ta sostene su miembronan door di ofrece nan diferente herment cu ta haci nan trabao diario mas facil, incluyendo beneficio y descuento special riba training y educacion. VSCD su meta principal ta pa conecta diferente establecimento den Reino Hulandes cu otro y ta stimula su miembronan pa intercambia conocemento cu otro.
E miembresia ta un honor grandi pa Cas di Cultura, mirando cu Cas di Cultura ta e prome plataforma den Caribe Hulandes cu a ricibi e oportunidad aki y ta den pleno preparacion pa su renobacion. E experticio y sosten cu Cas di Cultura lo ricibi for di VSCD y su miembronan sigur lo ta beneficioso y lo yuda Cas di Cultura den e proceso pa garantisa fondo for di e instancianan di arte, cultura y teatro renombra den exterior.
E renobacion di Cas di Cultura ta esencial pa por sigui brinda nos comunidad un bon servicio, no solamente como teatro, pero como centro cultural completo. Den cuadro di esaki, directora di Cas di Cultura, Vicky Arens, a presenta e plan di renobacion na Parlamento di Aruba, hunto cu colega Evita Marchena cu ta na encargo di Cas di Cultura su recaudacion di fondo y presidente di e Hunta di Supervision di Stichting Schouwburg Aruba, Carlos Tapias. E parlamentarionan presente a mustra hopi interes den e vision pa futuro di Cas di Cultura.
Cas di Cultura ta forma un parti importante di nos herencia cultural. Cu su 65 aña di existencia, e ta keda e unico teatro proscenico den henter Caribe y ta brinda oportunidad na un cantidad incontabel di artista, artesano, scolnan, maestronan di scol, musica, teatro, canto y baile y practicamente ta aporta na tur sector creativo.
E necesidad pa proteha y sostene e plataforma principal di cultura na Aruba ta evidente. E team di Cas di Cultura ta trahando duro y ta spera cu comunidad di Aruba henter, incluyendo sector priva y publico, por brasa e proyecto aki pa logra e meta di renobacion hunto.
