drs. Alexandra van Huffelen, Secretario di Estado pa Relacionnan di Reino, ta di bishita den e islanan den Reino y tabata tin un programa hopi intenso y druk na Aruba, di cual a presenta algun informacion di dje durante un conferencia di prensa diaranson atardi na Vertegenwoordiging van Nederland in Aruba (VNO).
Den e encuentro aki na Aruba a toca varios diferente tema. E secretario a laga sa si cu a pesar cu ainda no tin ningun acuerdo concreto riba interes abao pa prestamo di Covid, e relacionnan entre Aruba y Hulanda ta bayendo bon y tin confiansa cu tur cos lo sigui cana den un caminda positivo e lunanan venidero.
E motibo di mas importante pa kico e secretario di estado ta na Aruba ta pasobra ta poco mas cu un aña cu a pasa caba despues di firmamento di onderlingeregeling. A palabra cu lo ta trahando hunto pa e reformanan cu lo ta bon pa reforsa e islanan, repasa kico tur a realisa durante ultimo tempo y tambe kico falta pa haci den e siguiente dos añanan cu e onderlingeregeling ta cana pa futuro.
Na Aruba a reuni cu minister-president, Minister di Finansa y tambe Minister di Enseñansa pa repasa algun tema. A toca un poco riba e palabracionnan cu minister mr. Xiomara Maduro riba traha hunto pa reforsa sistema fiscal, pa simplifica esaki y mas cu tur cos con por aumenta entrada.
A mira cu a logra hopi den loke ta reformanan fiscal, manera introduccion di BBO na frontera, a bishita AZV unda el a haya un bon presentacion riba acuerdo den cuido cu a logra den e ultimo tempo, con e gasto di cuido lo desaroya y con por mantene esaki bao control cual segun van Huffelen ta un tema hopi importante, con a forma un sistema basa riba mas comprension hunto cu tur parti den e sector di cuido.
A ricibi tambe un presentacion riba reorganisacion di gobierno, con por sigura cu ta duidelijk kico e tareanan cu gobierno tin cu haci, cua ta e tareanan esencial, kico posiblemente mester laga traha mas riba mercado, y con por sigura cu tin suficiente capacidad. E cantidad di funcionarionan publico inactivo cu a keda reduci, y tambe cuanto a inverti den enseñansa pa mehora calidad pa traha cu miho material di les, palabracionnan tocante e idioma y cual idioma lo uza den enseñansa. Van Huffelen a señala tambe riba con den pasado Hulanda tabata tin placa pa proyecto pero te ey tambe e tabata keda, mientras cu awor ta buscando p’e reformanan mas duradero.
“Mi a mira hopi resultado impresionante, mi ta kere cu berdaderamente a logra bon resultado hopi bunita, y esakinan ta e reformanan specialmente ora ta trata di cuido di salud of enseñansa, unda cu naturalmente no ta cosnan cu bo ta logra lihe.
Ta pasonan complica y pa mira tambe cu realmente a logra, un refleho di con nos mester haci esaki tambe pa Hulanda pasobra nos mes tambe ta lucha hopi biaha cu cambionan grandi”, van Huffelen ta splica. E temanan manera sistema di pension, cuido den salud y maneho den costo di esakinan, apart di e bon resultadonan logra aki na Aruba, van Huffelen ta señala cu ta temanan cu nos por siña for di otro.
Tur cos ta importante
Van Huffelen a bisa cu kier sigui pa dilanti pa sigui na reforsa enseñansa, mehora cuido den salud, deporte, unda lo sigui traha y brainstorm hunto pa mas palabracion adicional cu lo bini e lunanan venidero. E secretario ta bisa cu tur cos ta importante, no ta asina cu ta stop di traha riba e parti di sistema fiscal por ehempel pa bay na un otro sin termina.
A toca tambe un rato riba e parti di sostene proyectonan social relaciona cu slavernijherdenking y tur loke ta rond di dje. Generalmente e secretario di estado a señala na bon encuentronan cu nos gobierno ultimo tempo y con bon ehempel ta ser crea pa sigui fortifica e relacion- y palabracionnan haci den Reino.
