Dialuna algun minuut prome cu 5:00 pm a sosode un accidente dilanti di Well Well Bar & Restaurant. For di direccion di Santa Cruz tabata bin un pickup cu tabata bay direccion Playa e momento ey, pero e chauffeur a perde control di su auto.
Na momento cu e tabata biniendo un mucha a crusa y pa no dal e, e chauffeur masculino a primi break y consecuentemente el a perde control di e pickup. Esaki a pone cu el a dal den trafico contrario, cu tabata un Toyota Yaris, cu tabata bay direccion Santa Cruz.
Polis di trafico a presenta na e sitio pa tuma dato di e accidente aki. E chauffeur femenino di e Yaris tabata keha di dolor y di biaha a pidi asistencia di ambulance. Na yegada di ambulance, e paramediconan a atende cu e muhe y despues a transport’e pa hospital.
