Aportando na educacion financiero na Aruba den ultimo dos aña, Banco Central di Aruba (BCA) anualmente ta organisa un programa nacional di Global Money Week Aruba (GMWA).
Den e programa di educacion financiero dirigi na muchanan, BCA ta traha hunto cu partnernan local manera, Aruba Bank N.V., Banco di Caribe, Caribbean Mercantile Bank, CIBC First Caribbean, Ennia, Gobierno di Aruba (Futura & IDEA), Guardian Group, Kiwanis Club of Aruba, Qredits, RBC, y Setar N.V., conhuntamente cu un cantidad grandi di colaboradornan, pa por haci e programa aki posibel. Den un forma di speurtocht circular, mas cu 50 klas a completa e ruta di educacion financiero den Downtown San Nicolas y a bishita tur 7 diferente stacion, incluyendo ‘Discover’, ‘Learn’, ‘Earn’, ‘Save’, ‘Spend’, ‘Share’ y ‘Innovate’.
Na cada stacion e muchanan a toca un tema, y a siña na un manera interactivo over di e diferente caracteristicanan di e biyetenan di florin, con pa traha placa, con pa uza placa na un manera responsabel, y con pa spaar placa. Durante e dos añanan aki e muchanan a participa na e proyecto di arte di Global Money Week na e stacion di Save, conhuntamente cu Guardian, CIBC First Caribbean y ENNIA. E muchanan a crea un obra di arte traha di moneda. Dia 18 di november 2019 e obra di arte aki a wordo otorga na Fundashon di Museo Aruba (FMA) como simbolo di graditud y colaborashon entre partnernan cu ta participa na GMWA. Globalmente, e importancia di educacion financiero ta reconoci como un elemento importante di bienestar personal, como tambe un condicion necesario pa crea un comunidad sostenibel cu ta inclui un y tur.
E relevancia cada bez mas grandi di educacion financiero como un habilidad di bida importante, particularmente pa e siguiente generacion, ta destaca na un manera prominente den e agendanan nacional, manera observa via e organisacion Global Money Week. Pa mas informacion riba e actividadnan di GMWA como tambe nos plan y iniciativanan pa 2020, cu e aña aki lo tuma lugar den e siman di 23-27 di Maart den Caya Grandi di Oranjestad, por bishita y sigui nos riba nos Facebook page di GMWA ‘Global Money Week Aruba’.
