Parlamentario Plet: Ladronisia di outo mester bira un di e prioridat pa Minister di Hustisia

128

For di aña 2016 te ku 2019 un total di 1143 outo ku a keda hòrta aki na Kòrsou. Gran parti di nan te ku awe no sa paradero di nan outo i tin a haña nan outo pero totalmente kima i tin persona ku tin suerte a logra haña nan outo bek pero faltando algun piesa. Mi a keda sorprendí na momentu ku Minister di Hustisia a atmití ku no ta hasiendo lo sufisiente pa frena e ladronisia di outo.

Un situashon ku tin un  impakto hopi grandi riba un  hende su bida diario i emoshonal mirando ku e la pèrdè su método di transporte di un forma hopi kruel. Ta imposibel kon un pais chikí asina ainda no por yega na manehonan konkreto pa por frena e fenómeno di ladronisia di outo. E situashon aki ta oumentando kada aña i no ta mira ku lo por yega na un solushon pa alomenos baha e kantidat di outonan ku ta keda hòrta.

Konsekuensia di e aktonan aki ta pone ku hopi hende no ta sali nan kas pa bai niun kaminda prinsipalmente den oranan di anochi dor di e miedu di sali pafó i mira ku nan vehíkulo a disparsé. Riba esei e tin di keda paga banko tur luna siendo ku e no tin e vehíkulo aki mas.  Mas alue e ta pone ku hopi hende no por drumi trankil esaki debí ku nan tin e vehíkulonan ku mas ta keda hòrta. Pa nos esaki sigur ta algu ku nos no por aseptá mirando ku nos ke pa e pueblo tin e siguransa ku alomenos ta trahando i hasiendo e esfuersonan pa purba frena e fenómeno aki.

Den un reunion di parlamento ku a tuma lugá dia 19 di òktober 2017 Parlamento a deliberá ku Minister di Hustisia enkuanto di e situashon alarmante di ladronisia di outo. Na final di e reunion aki frakshon di MAN a presentá un moshon ku diferente rekomendashon na gobièrnu kon pa medio di kambionan den maneho di sierto departamentonan por yuda frena e fenómeno aki  ku a karga sosten unimamente. Ban di esaki den aña 2020 ku ta 3 aña despues di reunion ku nos a deliberá ampliamente riba ladronisia di outo nos a ferwagt ku lo tabatin avanse pero pa nos gran sorpresa ma ripara esei no ta e kaso.Frakshon di MAN na nòmber di pueblo di Kòrsou ta urgi ku Minister di Hustisia pa hasi ladronisia di outo prioridat pa asina mustra ku ta atendé ku e doló i preokupashon di nos pueblo. Teniendo kuenta ku e sifranan spantoso ku kada aña ta oumentando.