E cambionan politico den Parlamento ta ocasiona dor di salida repentino di Daphne Lejuez for di e Fraccion di MEP a causa cambio den henter e constelacion y forma di sinta den sala di Parlamento. Por ehempel oposicion, cu tabata conta cu 9 asiento, desde ayera ta sinta den un grupo di 10 Parlamentario. Esaki ta haci cu awor coalicion tin un mayoria limita di 11 asiento y ta haci cu awor cada Parlamentario tin e yabi di gobernacion den nan man!
Mester menciona cu na momento cu Daphne Lejuez a anuncia su salida for di fraccion di MEP y bira independiente, el a bisa di lo sigui traha bou di e ideologia di MEP. El a hasta menciona cu pe ta importante pa sigui e maneho di tene e hende central.
Sinembargo, mesora su tras e partido a sali atak’e, haciendo asina cu el a bira dificil pa por sigui traha hunto den un coalicion. Den e reunionnan publico cu a sigui e siman aki, el a opta pa bay sinta den banki di oposicion, dilanti di e fraccion di AVP.
A nota eyden tambe cu e ambiente entre e ex-coleganan di MEP y Lejuez ta bastante hostil. Ta pone nos corda tempo cu e mesun lider di MEP awe a core cu Marisol Lopez y Mervin Wyatt for di e fraccion. E tempo ey a laga cambia slot di portanan di oficina mesora pa evita cu nan tin acceso na Fractiekamer y otro espacionan comparti di e fraccion color geel. E mesun “modus operandi” ta sigui awor, pero cu Daphne Lejuez, kende no kier a sucumbi pa presion di Otmar Oduber pa pasa “su” ley di Serlimar, a costo di comercio y ciudadanonan di nos isla.
