Diabierna atardi a pidi presencia di polis na un hotel pa un caso di un persona perdi. Turistanan mericano di bishita riba nos isla a duna di conoce cu un familiar di nan lo ta perdi y no por localis’e.
E ruman homber a duna discripcion na polis di con e tabata bisti y asina a bati alarma y manda e informacion rond. E persona lo tabata bisti na un flanel strepi berde, short kaki y keds berde.
Mas den anochi ta drenta informacion cu a mira dicho persona den area di Domino’s Pizza na Savaneta. Polis a presenta mesora na sitio pa asina confirma si en berdad tabata trata di e turista cu nan tabata buscando.
Segun testigonan den area, e persona lo tabata cana tur bruha rond y basta cansa. No a topa cu ne caminda a indica prome, pero un distancia mas pabou, na haltura di Ritz Savaneta. E tabata riba un one happy trip.
Na sitio a logra haya un declaracion di e turista caminda el a conta cu e tabata na Charlies Bar na San Nicolas hunto cu su ruman homber y den un frega di wowo el a perde nan for di bista. Na final a transporte bek pa hotel serca su famia.
