“E obra ta consisti di 4 elemento, pues 4 piesa. Cada piesa ta representa un ser humano. Cada ser humano tin un curpa mas dos brasa y un cabes. E 4 curpanan tin tamaño di chikito bay grandi. Solamente un di e curpanan (esun di mas grandi), ademas di tin un cabes y dos brasa tambe esun di mas grandi tin un pia cu ta sali, cla pa jump over the ocean, cla pa crusa frontera”, asina e arkitecto Jani Croes a splica e nificacion di e obra di arte cu a expone riba rotonde dilanti Guardian Life na final di Watty Vos Boulevard.
E obra di arte aki ta nifica:
- PROGRESO: di curpa chikito pa curpa grandi ta nifica crecemento. E speransa cu Aruba lo crece economicamente, intelectualmente y moralmente.
- BAILE-CARNAVAL: baile y musica di soca, folklore, salsa y tur otro clase di musica. Tin speransa cu esaki lo no muri a pesar di tempo dificil.
- AMOR: for di diferente angulo por reconoce e forma di curason den e sculptura. E curason di nos hendenan bibando na Aruba. Nos curason ta distingui nos di nos competidornan den turismo. Nos bondad ta duna speransa pa sobrevivencia.
- MOVECION HUMANO: na Aruba tin hopi movecion di sernan humano. Constantemente tin crusamento di frontera, legal of ilegal. Bishitantenan, tambe hende cu compromiso di trabao na Aruba of den exterior, imigracion y emigrashon
- CRUSAMENTO DI FRONTERA DI NOS HENDENAN PA CAUSA EXITO MUNDIAL: den deporte (windsurfing, baseball, natacion y mas) den musica tin varios yiu di tera ta sobresali internacionalmente y tambe nos cientifico na NASA. Tin e speransa cu esaki lo sigui.
E piesa mas grandi den e cuaternan ta representa esaki. E ta e unico piesa cu ta manera saca un pia pa crusa ocean. Sali di Aruba pa causa exito mundial. E obra aki no a competi cu niun otro obra y no ta existi NIUN obra cu mi mester a inspira riba dje.
E obra Speransa ta dedica na cada persona cu ta biba riba e pida baranca ki, cu ta traha pa hiba Aruba dilanti, paso mi STIMA e pueblo di Aruba SIN excepcion.
