Diahuebs ultimo Aruba a haya bishita di representantenan di Organisacion di Estadonan Americano (OAS).
Specificamente e coordinador di OAS pa crisis di migrantenan y refugiadonan Venezolano, David Smolansky, tabata na Aruba por por scucha testimonio di Venezolanonan cu a yega Aruba nabegando den un peñero durante 48 ora. Tur esaki el a bisa den un declaracion cu el a duna na Venezuela na su yegada.
Segun por a lesa di su declaracion, tin “por lo menos 10.000 Venezolano cu no ta regularisa na Aruba”. Pero no ta bisa den e declaracion con el a yega na e cifra aki.
Loading...
Reload document 
Open in new tab Manera ta corda, recientemente Prome Minister mr. Evelyn Wever Croes a bisa den un conferencia di prensa cu tin un delegacion di OAS biniendo Aruba. Di e publicacion na Venezuela, por lesa cu e bishita tabata diahuebs ultimo. Nan ta bisa di a papia cu Gobierno pero e coordinador no a duna mucho mas informacion di e encuentro ey ni cual otro reunion nan tabatin.
Smolansky a bisa si cu el a recomenda Gobierno di Aruba pa cuminsa cu un proceso di registro pa “e migrantenan por tin acceso na trabou, servicio di salud, educacion y realisa transaccionnan bancario”.
El a cuminsa su biahe dia 11 di juni pa bishita Corsou y su biahe a finalisa diahuebs na Aruba, unda el a combersa cu Prome Minister y Alto Comisionado di Nacionnan Uni pa Refugiadonan (Acnur). “Nos ta di acuerdo cu e mandatario di Aruba cu e crisis di Venezuela ta un crisis global.”
Smolansky a bisa cu el a scucha testimonio di Venezolanonan cu a yega e isla nabegando den un peñero durante 48 ora. Y a bisa tambe cu 16.000 Venezolano a yega Aruba, cual ta 15% di e poblacion di Aruba.
Loke cu a hala atencion tambe den su declaracion ta ora cu el a bisa cu “ta importante pa recorda cu Aruba ta forma parti di Reino Hulandes y cu, den e sentido ey, nos ta mira un oportunidad di envolvi mas ainda Union Europeo pa proteccion y integracion di migrante- y refugiadonan Venezolano,” el a finalisa bisando.
Loading...
Recientemente Hulanda a priminti mas di 23 miyon euro na ayudo pa Corsou y Aruba pa atende cu e crisis di Venezuela. Esaki sinembargo no ta nifica cu e islanan ta bay haya e placa. E Gobiernonan mester traha un lista di necesidad y Hulanda lo paga pa esakinan. Por ehempel, si mester di materialnan pa siguridad, Hulanda lo cumpra y manda nan pa Aruba.
Segun datonan di Acnur, desde aña 2015 no menos cu 4 miyon Venezolano a bandona e pais memey di un emergencia humanitario masha complica.
