“Tramitenan ta tumando luga pa yega na un Hefe pa Cuerpo di Policial despues cu solicitud a sali den medionan di comunicacion. Mientras tanto e comision encarga entre otro di Ministerio Publico y DRH a informa Minister di Husticia mr. Andin Bikker cu nan no a keda cla cu e proceso”, asina un comunicado di Ministerio di Husticia ta informa. Di parti Minister Bikker, e ta spera cu den e proximo simannan por haña conseho y mas informacion di parti e comision di e procedura. Mientras tanto Andrew Hoo ta sigui como Altocomisario di Cuerpo Policial Aruba.
Mester menciona cu aunke e tipo di proceduranan asina sa tuma nan tempo, toch e decision aki a cay di sorpresa pa por lo menos e tres candidatonan den Cuerpo Policial Aruba cu tambe a solicita den e puesto. Por lo menos un di nan a spera algo asina, mientras un otro a opina mesora cu e desaroyo aki “no ta pinta bon”. Tur ta cuestiona kico por pone cu Departamento di Recurso Humano mester tuma tanto tempo asina pa yega na un conseho na Minister di Husticia.
E candidatonan:
E tres otro coleganan cu a solicita pa e puesto aki y por aprecia nan e siman aki ainda, di robes pa drechi: Altoinspector Alvin Molina, encarga cu districto di Oranjestad; Comisario Vanessa Tjon-Kock encarga cu “Bijzondere Diensten y alabes encarga cu “Recherche diensten” (Nunca a nombra otro Comisario ora Trudy Hassell a bandona Cuerpo Policial) y Altoinspector Gino Winklaar encarga cu districto di San Nicolas. Nan tur tres a haña di tende cu nan tin algun dia mas pa ‘carga pasenshi’ pa e proceso di reclutacion y evaluacion tumando luga.
Gino Winklaar
Entre esunnan interesa pa e puesto ta Altoinspector Gino Winklaar. El a drenta Cuerpo Policial Aruba dia 1 di juli 2000 y mesora a bay studia na Hulanda pa e puesto di Inspector. Aki na Aruba bek el a traha den diferente funcion, entre otro como “Projectleider” y Hefe suplente den Recherche Samenwerkings Team (RST) pa 5 aña largo. Ey el a conduci varios caso y investigacionnan grandi, den cual a encera crimennan cu ta crusa frontera de Reino Hulandes y tin biaha hasta pa otro paisnan rond mundo. Desde dia 14 di mei 2018 e ta den funcion di “Districtchef” na San Nicolas, den cual su tarea ta pa mantene e operacion diario di henter e districto, incluyendo Polisnan uniforma, recherchenan, e personal administrativo y e departamentonan special cu ta traha for di e Warda di Polis di San Nicolas. For di momento cu Gino Winklaar ta na San Nicolas, a nota mehoransa den e forma di traha, den materialnan cu el a percura pa haya, incluyendo algun cambio den e infrastructura di e edificio.
Alvin Molina
Alvin Sigmar Charles Molina a studia na Colegio Arubano, a caba VWO y despues a bay Hulanda unda a studia na Nederlandse Politie Academie na Apeldoorn entre aña 1998 pa 2002. De facto, e ta forma parti di Cuerpo Policial Aruba desde aña 1998. Den su carera el a ocupa varios puesto y a encabesa investigacionnan grandi, manera entre aña 2010 y 2012 ora e tabata lider di proyecto na Recherche Samenwerkings Team (RST). Di eynan el a asumi e puesto di Hefe di districto di San Nicolas entre aña 2012 y 2018. Desde luna di mei 2018 e ta na cabes di districto di Oranjestad, esun di mas ocupa di Cuerpo Policial Aruba. Si acaso scog’e como Altocomisario di Polis, e ta haya cu “Polis ta e anker den e corientenan fuerte, iregular y tin biaha invisibel cu ta tipifica nos comunidad di awendia. Servicio na pueblo y bishitantenan di Aruba pa cu nan siguridad, ta e meta primordial di tur Polis. Pa logra esaki mando policial mester inverti den su hendenan, demostrando liderazgo, integridad y perseverancia, asina otorga na nan e mesun servicio cu nan ta duna pueblo”.
Andrew Hoo
Andrew Hoo tin un trayectoria largo den husticia. El a cuminsa den Cuerpo Policial Aruba na aña 2001 pues e tin un diploma MBO Politieopleiding niv. 4, Politie Academie te Appeldoorn, Bachelor Of Science Hotel Administration, Associate of Science Hotel Management y Executive Master of Tactical Policing Major in General Leadership. Andrew Hoo ta un persona profesional y dedica na su trabou. E ta casa y tin dos yui. Un persona dedica na su famia. Despues di a bay forma parti di e famia di Marriott Hotel Aruba como Complex Director of Loss Prevention and Risk Management, el a bolbe su cas bek na unda el a sirbi su pais cu honor y pasion pero e biaha aki e ta cla pa fungi den e posicion di Korpchef di Cuerpo Policial Aruba. Un persona cu conocemento amplio den e parti hudicial, industria di turismo y seguridad.
Vanessa Tjon-Kock
Vanessa Tjon-Kock ta casa cu Parlamentario Rocco Tjon, cu tambe a sali for di Cuerpo Policial Aruba. Vanessa Tjon a studia pa Inspector di Polis na Appeldoorn, Hulanda y tin un trayectoria largo den Cuerpo Policial y pa hopi aña ta den e rango di Comisario y como tal ta encabesa e departamento investigativo di Polis, conoci como “Recherche Diensten”. Banda di esey e ta lidera tur ekipo special tambe di Polis. Mayoria investigacion grandi di e ultimo decada aki a pasa bou di su supervision. No por keda sin menciona cu na varios ocasion el a ocupa e funcion di Altocomisario suplente. Si ta pa esun cu tin mas aña di experiencia den Cuerpo Policial of den un funcion ehecutivo, anto sin duda Comisario Vanessa Tjon-Kock ta sobresali.
Cuerpo Policial Aruba ta existi desde aña 1986 y ta conta cu mas o menos 600 Polis, incluyendo personal administrativo. Ta un di e departamentonan di Gobierno di mas grandi di nos pais, cu mas personal, mas edificio y mas auto, boto y hasta helicopter na nan disposicion.
