Tur aña comunidad ta cuminsa busca luga publico trempan pa reserva pa por mira carnaval na un lugar cu nan ta desea. Pa reserva e sitio apropia, ta pone obheto trempan caba y esaki ta prohibi! Cuerpo Policial Aruba ta anuncia cu por reserva bo area preferi cant’i caminda pa Parada di Mucha San Nicolas desde 12’or di anochi.
Prome cu 12’or di anochi of algun dia prome esaki ta prohibi cu consecuencia cu Polis por confisca tur obheto cu ta forma peliger of ta stroba caminda publico den beslag. Esaki ta conta pa tur parada di carnaval.
Tambe a probecha pa corda publico amante di carnaval cu durante cu e parada ta pasando ta prohibi pa core cu bicicleta riba e ruta, strobando tanto e participante y/of e publico canto di caminda. Tampoco no por maniobra y pasa cu bo bicicleta memey di e participantenan den carnaval.
No cumpli cu esaki por traduci den confiscacion di bo bais y lo hib’e Warda di Polis. E hoben aki lo mester presenta cu su mayornan na Warda di Polis pa duna cuenta y mester para responsabel pa loke cu a sosode.
Tur hoben menor di edad of adulto cu ta desea di bay carnaval, tene cuenta cu e maneho aki. Core bo bicicleta iresponsabel por tin consecuencianan tambe. Ta responsabel y tene na cuenta cu e bicicleta mester ta na ordo pa por ta riba caminda publico.
Coremento di bais den forma iresponsabel manera hop, core memey di caminda, stroba peaton y stroba otro vehiculo di motor tambe lo tin concecuencia!
