E medidanan cu gobierno a tuma ta decisionnan dificil. Principalmente si tene cuenta cu nos frontera ta habri y tin turistanan yegando Aruba. Minister encarga cu Turismo Dangui Oduber a bisa den e ultimo conferencia di prensa di gobierno, cu e ta compronde pakico preguntanan asina ta bini. Esta si tin excepcion di e medidanan pa cierto areanan, esta den hotelnan.
“Dificilmente bo por tuma un decision riba un hotel. Si kier cera tur e seccionnan di entretenimento cu hotel tin, anto lo mester bay den lockdown. Dificilmente por prohibi hotel di habri e luganan aki.”
E mandatario a bisa cu nan ta compronde e preocupacion di esnan cu no ta opera un negoshi den hotel. Pero mientras cu tin frontera habri, mester laga hotel ofrece e servicionan cu nan tin na su huespednan. Si no lo mester bay den un lockdown y esaki no ta e momento adecuado pa esey. E motibo ta cu e cifranan ta subiendo. Crucero ta cuminsa na juni y e di dos kwartaal ta mustra positivo, cu aumento di capacidad.
“E medidanan no ta bin na e miho momento. Como gobierno no por haci otro. Si no tuma medida, otro pais ta tuma nan pa nos, manera e conseho di biahe cu Hulanda a tuma.”
El a recorda cu den lunanan di fin di aña pasa hopi famia a bay keda na hotel. P’esey e ta pidi pa sacrifica e hospedahe na hotel, pa logra baha e cifranan di contagio. E mes ta cansa di e situacion di Salubridad Publico, pero e ta spera cu e dos siman di sacrificio, hunto cu e proceso di vacunacion lo por yuda baha e cifra di contagionan. Ora esey sosode, por cuminsa suavisa e medidanan atrobe.