Comisario di polis, Trudy Hassell a confirma un rato pasa, den un conferencia di prensa yama pafo di instituto coreccional KIA, cu e tabata para pafo di prizon wardando salida di Blauw. Pero no pasobra e tin un relacion amoroso cu ne, sino pa e papia cu ne y dun’e conseho pa e keda riba e bon caminda awo cu e ta haya un di dos chens den bida. Hassell a lamenta cu prensa, specificamente e corant Awe Mainta, a publica e noticia ey sin papia cu ne prome y sin puntr’e prome si ta berdad e ta namora di e preso.
Hassell a corda tur hende cu 17 aña pasa el a start e movemento di Let’s Talk den cual e ta yuda hobennan y adultonan cu cay den mal caminda, pa nan bolbe bek riba e caminda corecto. E tin varios storia di exito di hendenan den comunidad cu a sigui e trayecto y cu a cambia nan bida y awendia ta biba un bida ehemplar.
Segun e comisario di polis, cu den pasado tabata director di KIA y hefe na Guarda nos Costa, cu esaki ta precisamente locual e ta haciendo atrobe. E conoce Juan Junior Quant, conoci como Blauw, for di tempo cu e tabata dirigi KIA. Y el a pensa, ayera cu el a sali bek di prizon, cu e ta lanta extra trempan pa percura cu e ta prome cu 7:00 am para pafo di KIA pa ward’e sali pa e por papia un rato cu ne.
Mester menciona cu e intencion no a cristallisa, pasobra berdad a constata cu Hassell a yega KIA, a bay na porta papia cu e miembronan di siguridad, e no a drenta den cura, sino a bin para pafo banda di e unidadnan di prensa y di amigonan di Blauw cu tabata sperando riba dje. Despues el a bay staciona un poco mas leu y prome cu Blauw a sali finalmente for di prizon, ya el a bandona e sitio caba. Pues, su interes pa por a papia cu e exacusado a caba prome cu el a hasta sali di KIA pa cuminsa oficialmente su bida di homber liber.
Comisario Hassell no a aprecia e articulo di Awe Mainta y a bisa cu el a papia cu un hurista caba awe. E ta evalua pa cuminsa un procedura legal contra e medio di comunicacion. E motibo ta cu Hassell ta fada di tanto biaha cu a skirbi di dje den prensa, siendo e contenidonan no tabata berdad of no completamente berdad.
E critica mas bien riba e ex-director di KIA tabata cu e no ta pas pa e para pafo di prizon, den auto di Dienst, paga door di gobierno, pa haci un asunto personal.
Pero di otro banda, e actual comisario di polis a expresa como siendo un polis nan ta haci hopi mas cu djis core tras di ladron. Tambe ta haci trabou social, manera entre otro atende cu expresonan cu a caba di sinta nan castigo y cu awor ta cuminsa un bida nobo.
