Presidente di Venezuela, Nicolas Maduro, a anuncia ciere pa 72 ora di e frontera cu Aruba, Corsou y Boneiro, atrabes di e activacion di “Plan Centinela de la Soberania y contra el Contrabando,” segun NTN24.
E mandatario a informa cu Fuerza Armada Nacional, tin instruccion di tuma tur puerto y aeropuerto unda cu ta realisa y desaroya rutanan comercial cu e islanan di Aruba, Corsou y Boneiro, cu e obhetivo di pone fin na e extraccion di producto y mineralnan Venezolano atrabes di e frontera.
El a agrega cu su gobierno a purba di realisa conversacion cu e gobierno di e tres islanan aki, di cual no a haya respuesta. Rason cu a hib’e na tuma e medida di e ciere pa 72 ora di e rutanan comercial.
“Mi ta exigi na e gobierno di Aruba, Corsou y Boneiro pa tuma e medidanan cu e gobierno Venezolano a exigi pa detene e contrabando di extraccion. Nan ta hibando nos coltan y otro mineralnan,” Maduro a precisa.
E presidente Venezolano a garantisa na turista y biaheronan e transito liber pa y for di Aruba, Corsou y Boneiro durante e 72 oranan di e ciere di frontera.
