Apesar cu e retiro di Sue-Ann Ras a wordo haci publicamente despues di e scandal di Netflix, te ainda Conseho Electoral no a ricibi notificacion di esaki.
Mr. Glenn Thode ta presidente di Conseho Electoral y e ta splica riba con e proceso ta bay na momento cu un parlamentario ta tuma su retiro, referiendo aki na ex parlamentario di MEP, Sue Ann Ras. Tin diferente forma, sea cu e parlamentario ta bira independiente of ta tuma su retiro completamente.
Den e caso aki, tin un parlamentario cu a haci un anuncio. Mr. Thode ta splica cu unabes cu un persona cu a bay eleccion y eligi como miembro di Parlamento di Aruba, e ta keda miembro di e Parlamento te ora surgi sea un condicion cu ta incompatibel cu su funcionamento como miembro di Parlamento, of e mes pidi retiro. Den e caso aki berdad, tin noticianan di un persona cu lo a anuncia cu e ta bay tuma retiro. E procedura cu lo mester sigui ta cu e lo mester manda esaki por escrito.
E no ta prescribi e forma exacto, pero e procedura ta si pa e notifica Gobierno di su decision. En principio, e miho forma pa haci algo asina ta por escrito. Gobierno na su turno ta suppose di notifica e presidente di Parlamento y tambe Conseho Electoral di e carta. Si ta berdad cu e retiro a tuma luga e ora den e forma ey, e asiento cu e persona tabata eligi p’e, ta bira vacante. Mester determina, a base di e resultado di eleccion atrobe, pa inicia un proceso, di kende ta e proximo persona cu a ser eligi pa e asiento ey. E mesun proceso cu a tuma luga despues di eleccion pa determina ta ken tin derecho pa tuma e asiento, esey lo inicia.
E ta nifica cu ta bay wak e ora ta ken ta e proximo persona cu, segun e lista di resultado di eleccion, ta bin na remarca pa e asiento. E ta ser notifica y e por acepta e asiento of e por bisa tambe cu e ta rechasa e asiento.
Si e acepta, e ehercisio ta tuma simplemente un ciclo so. Si e rechasa, mester bin un siguiente ciglo riba e proximo persona cu ta na beurt cu ta den e fila. Si e tambe ta rechasa, ta continua asina.
Ley ta duna un posibilidad pa continua cu e ciclo si un persona rechasa, di e mesun forma e momento despues di eleccion, Thode a splica.
No tin ningun peticion
Thode a comenta cu te na e momentonan aki, Gobierno no a notificia cu, segun kiesverordening, lo tabata tin persona cu a tuma su retiro.
Esaki tin un balor entre personanan cu a firma pa yega na un asiento. E ley di eleccion ta determina kende ta e proximo persona cu tin derecho conforme ley pa tin un asiento. E persona ey, e cu su consenshi lo determina si e ta acepta of rechasa. En principio e ley naturalmente t’asina cu, como cu e ta prescribi cu un cierto persona tin derecho pa e asiento, ta esey ta bay ta e procedura. Riba e parti ey, un acuerdo asina no tin efecto riba e proceso legal.
Cambio
Si Aruba y esnan cu ta traha e leynan, ta haya cu e procedura actual no ta wordo carga pa nos comunidad completo of tur esnan cu kier drenta den e arena pa representa nos comunidad den Parlamento, e ora nan por cambia e ley.
Actualmente t’asina cu esnan cu haya voto di preferencia, semper lo ta esnan prome yama pa yena asiento. Ya caba tin den e sistema, dos forma pa yega na e asiento na modo di papia. Bo ta riba lista y en principio, e secuencia di e personanan riba e lista, ta determina tambe e secuencia pa yega na e asiento. Por ehempel number uno riba lista, ta e prome yama pa haya e asiento. Number dos lo ta e proximo. Si tin dos asiento, e di tres lo ta e proximo. T’asina aki tambe cu banda di e secuencia ey, toch e votadornan tin efecto riba si un persona por drenta of no den parlamento y representa nan. Esey ta si nan duna asina hopi voto na un candidato, cu e ta haya e votonan preferencial, cu ta mas cu mita di e kiesdeler pa e lista ey. E ora e por en principio, bin na remarca pa un di e asientonan.
Aworaki tin un sistema cu yama hybrid, den cual toch e votadonan por tin influencia. Pero en principio, e secuencia di e lista ta determina.
Si t’asina cu tin mas sosten pa un forma diferente, cu e cantidad di voto ta determina ken ta na beurt, e ora lo mester cambia ley riba e punto aki.
E proximo candidato
Pa cada un di e lista di partidonan cu a haya asiento, tabata tin algun di nan tabata tin voto preferencial. E ora lo mester cana e proceso conforme e parti ey, esta siguiendo e procedura di voto preferencial. Pero manera cu esnan ey a tuma retiro of tambe a nenga e asiento, e ora ta sigui nan secuencia di e lista.
