Tur cos ta mustra cu Archirah “Coekie” Trimon ta recuperando positivamente di e operacion largo cu el a pasa aden na Hulanda, pa atende e problema di atakenan di epilepsia cu e tabata haya continuamente.
“E operacion a bay miho di loke nos y e dokternan a spera,” e mama Andreina Tromp a comenta 24ora.com Archirah ta un mucha muhe super spierto y hopi alegre cu tin solamente 4 aña di edad. Na mei 2016 Archirah a haya su prome convulsion cu a wordo considera como koortsstuiping. Despues di esaki Archirah a keda interna casi 1 siman den hospital.
Momento cu Archirah a sali for di hospital a keda basta luna bon te despues di 1 aña Archirah a cuminsa haya atacanan cu a wordo considera como Epilepsia, pero dokternan no tabata sigur. Y asina a sigui e caminda en busca di un diagnostico y di e tratamento cu e mester sigui. Finalmente, despues di mas cu un bishita na Colombia, el a wordo opera na juli ultimo na Hulanda, unda cu a desconecta e parti robes di su cerebro cu tabata causa e atakenan.
Tabatin dos aspecto cu e dokter y famia di Coekie tabata preocupa cun’e. E operacion tabata concentra riba e parti robes di e cerebro, cu ta controla e speech.
Tabatin miedo cu e lo no papia, pero asina cu el a habri su wowonan a constata cu esaki no a keda afecta. Y den un luna di tempo, e no a haya ningun atake. Esaki ta yena nan di speransa, mas awo cu el a culmina cu su proceso di rehabilitacion dia 5 di augustus ultimo. E tabata net un luna despues cu el a pasa den un operacion larguisimo, di dies (10) ora.
E mama di Coekie a conta cu e preparacionnan pa e operacion tabata uno yena di stress. “Semper e pensamento ta cu bo ta tumando e miho decision pa bo yiu. Bo ta mir’e ta core y cana, y bo sa cu despues di operacion e no ta mescos. E ta bay tin mester di nos ayudo 24/7.”
E operacion tabata basta largo, unda cu el a drenta camber di operacion pa 8’or di mainta y a sali bek casi 6’or di atardi. E tabata un operacion cu a bay hopi bon, dokternan no a haya ningun complicacion. A tarda pasobra tabatin algun area cu no a logra yega hopi lihe na nan. “E operacion a bay manera cu e dokter tabata kier. No tabatin bloeding y e operacion ta cerando super bunita.” E tin un luna caba di a haci e operacion, pero e prome simannan, segun e mama ta conta, tabata uno hopi duro pa Archirah. Principalmente ora cu el a realisa cu e no por move su mannan y pia manera cu e tabata kier, cu tabata frustrante p’e. Pero cu transcurso di dianan y combersacionnan hiba cun’e, el a realisa cu e tambe mester haci esfuerso di su banda. “Nos tabata papia hopi cun’e y splik’e kico mester pasa y cu ta e mes mester purba duna señal na su cerebro pa e man cu pia move.”
El a drenta caba na Revalidatie Centrum na Utrecht, unda e ta hayando fysiotherapie y ergotherapie, y tambe Logopedie. Loke cu a sorprende tur hende tabata cu Archirah a lanta despues di e operacion y a papia. “Esaki tabata algo cu nos no a spera y nos ta gradici Dios hopi pa esaki. E tabata algo cu nan no tabata sigur cu lo bay pasa. Y e ta papia hopi bon. Tambe el a cuminsa haya forsa bek den su pia, ta dal algun stap, cu ayudo. E por sinta su so y move sin ayudo. Solamente e no ta cana ainda.”Na inicio despues di e operacion Coekie, un mucha hopi independiente, a haya hopi fastioso, pasobra e no tabata compronde di con e no por move completamente. “Pa un adulto mes ta fastioso corda pa e mucha mes. E tabata yora y kier move lanta pa haci su cosnan. Pero e tin un ”will power” grandi. Dokternan ta bisa cu el a surpasa tur loke nan a pensa di su recuperacion.” 
Apesar di e limitacion di su pia, e ta sigui dilanti. “Nos ta kere cu e lo bay demostra nos cosnan increibel den su recuperacion. Ta increibel cu ora bo mira Archirah bo nunca por pensa cu e tin mita celebro so! Coekie a demostra y ta demostrando ainda cu e ta mas fuerte di loke nos ta pensa y cu loke e kier e por haci! Y den menos cu nos ta spera, e lo ta canando.”Mas contento ta cu e no a haya ningun atake di epilepsia. Si mester cuid’e, pasobra e no por ta den un ambiente hopi druk, aunke a ripara cu e tin hopi energia y no ta cansa lihe manera antes mas. Na final e mama Andreina Tromp a gradici tur hende cu a keda pendiente di su yiu y cu ta sigui manda mensahe y 24ora.com hunto cu su reportero Everlis cu ta yuda nan mantene pueblo na altura di e recuperacion di Coekie.
