Corte di Boneiro a condena e lider politico di PDB y Diputado, Clark Abraham, pa incumplimento. E mester paga Fundashon Mariadal e suma di 17.984,16 dollar, sumando 16 luna di interes riba dje.
Como e partido perdedo den e caso, e lo mester paga e gastonan di e procedura. Abraham aña pasa despues di a presenta un oferta atractivo pa entrega 1.000 clechi na Mariadal, a haya e contracto aki. El a haci e oferta aki via di su compania Yo! Branding & Productions y a pidi e pago adelanta di e suma di 19.548 dollar.
Hues Veerman den e sentencia ta menciona cu e compania aki no ta registra ningun caminda pa cual ta puntra si a paga e ABB. Esaki no ta descarta cu Abraham lo bay haya Servicio di Impuesto su tras tambe.
DEURWAARDER
Di e 1.000 clechinan paga cu e mester a entrega, na final a entrega solamente 80. Despues cu Mariadal, cu ta haya subsidio di gobierno, a nota cu no tin fin pa haya e resto di clechinan, a pidi pa haya e placa bek. Mirando cu e politico / comerciante a nenga di haci esaki of yega na un areglo, ni cu intermediacion di Deurwaarder, Mariadal a dicidi pa exigi su placa via di corte.
Tratamento di e caso aki a cuminsa den luna di september aña pasa. Abraham a presenta sin abogado y a pidi pa pospone tratamento di e caso. Pero pa sorpresa, e no a acudi na e di dos tratamento programa pa 25 di october y a bolbe dun’e un otro fecha, cu tabata 29 di november. Pero ta parce cu el a hunga un wega pasobra e dia ey tampoco el a presenta y hues a dicidi cu e lo manda e caso pa duna veredicto.
Tempo cu e cos aki a sali na cla, prensa a acerca su persona y el a bisa cu e ta lamenta cu ta trata di hinca e asunto aki den un esfera politico. O sea cu pa saca probecho politico, ta crea un imagen dudoso y cosnan politico cu ta di importancia mes, ta wordo poni un banda. Aunke den e sentencia ta para cu e prome biaha cu el a bay den corte, e no a nenga e sucedido.
Cu e condena aki e lider di PDB a sali di bon ainda, pasobra e Fundacion no a entrega keho contra dje na Ministerio Publico. No mester lubida cu desde october ultimo e ta diputado atrobe y e tin e cartera di Finanza.
E condena aki no tin consecuencia politico p’e. Esey no tabata e caso tampoco ora cu na 2018 el a haya un condena pa maltrato.
