Ta bay tin un feria di labor proximamente, pero den e mesun rosea por a tende cu tin cierto demanda pa cierto areanan di trabao, manera housekeeping por ehempel. Un trabao cu kisas bo no tin tanto exigencia, pero toch bo no ta haya hende pe. Den e area eynan FTA ta bon representa.
Segun Hubert Dirksz, presidente di e sindicato, tin un situacion riba mercado laboral. Semper na Aruba a falta pa un bon maneho. Un bon guia di kico ta pasa riba mercado laboral. Por ehempel un expo ta tumando luga, caminda cu e dunado di trabao y e trahado tin e oportunidad pa por haci un rematch, pasobra e trahado tin un deseo pa haya un trabao, pero e dunado di trabao tin su exigencianan. Nan mester yega na otro, segun Dirksz. Yega na otro pa por tin e calidad cu bo merece tanto den e trabao cu ta wordo duna y tambe e pago y e beneficionan.
Sa cu den e sector manera di hoteleria, den horeca, e departamento di housekeeping ta un departamento cu no ta mucho bon paga. Ta lamentabel pasobra e trahadonan aki berdad tambe ta un grupo cu ta depende di tips. Y e trahadonan aki, si no ta pa e tips cu nan ta ricibi, nan tin problema serio pasobra nan salarionan ta hopi abao.
Dirksz ta agrega cu e trabao eynan ta hopi duro. Na hopi pais tin explotacion hopi fuerte y na Aruba tambe. Kisas tin e consecuencianan caminda cu e ciudadanonan, trahadonan, ora cu nan yega na cierto edad, 55 aña, por imagina cu ta un edad cu ya nan no por haci e trabao aki mas. Ta yega un momento cu e trahadonan aki mester wordo reubica. Nan mester por sea haya entrenamento pa haya un funcion superior of wordo movi pa haya un otro funcion pa nan por sigui traha y mantene nan famia. Ademas di esey, e trabao ta un trabao hopi pisa. Mester di miho condicion di trabao, pa e gruponan aki pa e trahadonan aki no wordo explota pa evita cu e trahadonan aki ta bay haya problema di salud. Esey no ta pa solamente den housekeeping, pero tin tambe den varios trabao tin e profesionalismo, e profesion cu bo ta ocupa, ta nabo problemanan di salud. Manera un waiter, ta haya problema di su brasa, un camarera, di lomba, un enfermero ta haya tambe mesun cos di lomba y brasa. Asina bo tin un cantidad di funcion cu si ta bon ta yega un momento di edad cu sea nan oranan ta wordo reduci di trabao, pero asina mes ta preveni cu e persona aki ora e yega su edad di pensioen, ya e ta bay pasa un momento no agradabel na su tempo di biehes. Ta kere cu mester tin un atencion riba esaki.
