Durante e debate den Parlamento tocante e Cuenta Anual di 2020, parlamentario di FUTURO, Muzaninn Wever, a enfatisa cu, a pesar di e crisis sin precedente cu Aruba a enfrenta durante e pandemia, e situacion extraordinario no ta un excusa pa falta di cumplimento cu e ley di comptabilidad.
Wever a señala cu e reportenan oficial di e organonan di control ta esencial pa pueblo por compronde kico a pasa cu e fondo publico durante e periodo ey. Segun dje, e hallazgonan di e reportenan mester forma parti central di e debate parlamentario.
Iregularidad den fondo di yudansa
Segun Wever, e reportenan di Algemene Rekenkamer Aruba (ARA) y Centrale Accountantsdienst (CAD) a identifica varios iregularidad den e distribucion di fondo di yudansa durante e pandemia.
“E yudansa y e fondonan cu a destina tabata pa e pueblo cu tabata den necesidad. Sin embargo, e control a mustra cu placa a yega na man di ambtenaarnan, personanan cu a fayece y hendenan cu tabata tin otro entrada caba, mientras cu hopi hende cu realmente tabata tin mester no a haya e yudansa cu nan mester a ricibi”, Wever a declara.
E parlamentario a aclara cu e aprobacion di e Cuenta Anual no ta nifica cu Parlamento ta aproba e iregularidadnan ni e posibel mal maneho cu a tuma luga. E cuenta ta duna un bista di e cifranan financiero, mientras cu e hallazgonan mester wordo analisa mas profundamente mediante investigacion y auditoria.
Gobierno mester asumi responsabilidad
Wever a critica e argumento cu e crisis di salud publico por sirbi como hustificacion pa falta di cumplimento cu e normanan legal. Segun dje, aunke e pandemia a crea un situacion extraordinario, gobierno tabatin e obligacion di respeta e ley di comptabilidad.
“E crisis di pandemia tabata un situacion extraordinario, pero e no por ta un excuus pa kibra ley of pa pasa dos aña sin cumpli cu e ‘Comptabiliteitsverordening’”, e parlamentario a subraya.
Wever a recorda cu den e gobierno di e periodo ey tabatin profesionalnan cu conocemento juridico y financiero, incluyendo un ex-prome minister cu tabata fiscal di profesion y un ministro di Finansa cu tabata hurista. Pa e parlamentario, e presencia di profesionalnan cu e tipo di conocemento aki ta haci e cuestion di cumplimento cu e proceduranan legal ainda mas relevante.
E ta considera cu un crisis no ta elimina e responsabilidad di gobierno pa maneha fondo publico di forma correcto, transparente y conforme na ley.
“E ta yega un momento cu bo mester asumi bo responsabilidad como gobierno pa e mal maneho cu a tuma luga”, Muzaninn Wever a bisa.
