Diabierna 23 di october 2026, pa 8:00 anochi, Rocktober ta bolbe cu su di 9 edicion na K28 Art Bar. E evento lo reuni tres generacion di musiconan di rock di Aruba den un anochi dedica na e herencia musical di e isla, talento nobo y e futuro di e escena musical alternativo.
E edicion di e aña aki, cu titulo “The Founders”, ta presenta un seleccion musical cu ta celebra e desaroyo di rock na Aruba, for di e pioneronan cu a yuda establece e escena musical te na e musiconan experimenta y e generacion nobo cu ta trece musica original.
Contrario na edicionnan anterior, e Rocktober di e aña aki lo tin un enfoke mas melodico, cu enfasis riba clasiconan di rock, calidad musical, ritmo y presentacion riba escenario. E meta ta ofrece menos ruido y mas musica, celebrando e temanan cu a uni diferente generacion durante añanan.
Tres banda, tres generacion, un herencia musical
E prome banda di e anochi ta Black Thunder, un grupo nobo cu ta reuni musiconan cu tin raiz den e legendario banda di metal Arubano Megaforce. Cu decenio di experiencia musical y e participacion di musico internacional Alex Bowen, e banda lo presenta clasiconan di hard rock inspira pa grupo manera Black Sabbath, Deep Purple y Nazareth.
Drummer Roger Marquees, cu ta e cara oficial di Rocktober 2026, ta representa e generacion di musiconan cu a contribui na forma e historia di rock na Aruba.
E di dos banda ta 2AM Band, cu pa prome biaha ta forma parti di e programa di Rocktober, despues di peticion di e comunidad di Rock’n’Rock. E banda ta conoci pa su presentacionnan dinamico y su estilo cu influencia Latino den e interpretacion di clasiconan di rock.
Durante nan presentacion, publico por disfruta di temanan inolvidabel di e añanan 70, 80 y 90, cu melodianan conoci y ritmo cu ta invita hende canta hunto y move riba pista di baile.
E di tres banda, The 1986, ta representa e generacion nobo di rock na Aruba. E grupo hoben, cu a gana e Battle of the Bands di Cas di Cultura, ta trece energia, creatividad y mas cu tur, musica original.
Pa medio di Rocktober, e musiconan hoben ta haya oportunidad pa comparti escenario cu musiconan experimenta, gana mas experiencia y presenta nan propio zonido na un publico mas amplio. Esaki ta un manera pa sigui stimula e desaroyo di rock y musica original na Aruba.
Experiencia VIP di wine y cheese
Pa e edicion aki, e organisadonan tambe a prepara un experiencia VIP special di wine and cheese. E oferta ta inclui biña selecto di Argentina, acompaña di keshi y crackers.
Tin diferente paquete disponibel pa persona individual, pareha y grupo, incluyendo mesa reserva pa grupo, pa asina publico por disfruta di e anochi den un ambiente mas exclusivo.
Mas cu un concierto: Sosten pa K28 Art Bar
Ademas di ofrece musica en vivo, Rocktober 2026 tin como meta recauda fondo pa sostene K28 Art Bar y yuda e local continua su contribucion na e comunidad cultural y musical alternativo di Aruba.
K28 a bira un espacio pa musiconan, artista y publico cu ta aprecia rock y diferente genero underground. Localnan independiente di e tipo aki ta hunga un papel importante den mantene musica en vivo accesibel y brinda artista local oportunidad pa presenta nan talento.
Door di participa na Rocktober, publico no solamente ta disfruta di un anochi di musica en vivo, sino tambe ta contribui na e continuacion di un espacio cu ta sostene creatividad y expresion artistico na Aruba.
Patrocinador y colaboradonan
Rocktober 2026 ta conta cu e sosten generoso di Hodgson Trading y My Computer, cu contribucion ta yuda pa haci e edicion aki posibel.
MyComputer tambe a prepara premio special pa e rifa di disfraz di Halloween, cu ta reserva pa e invitadonan cu bin bisti den disfraz.
E organisadonan a expresa nan gradicimento na e partnernan di produccion, medio di comunicacion, vendornan, marcanan participante y tur esnan cu ta sigui brinda sosten na e comunidad di rock di Aruba.
Cu tres banda cu ta representa diferente generacion, Rocktober 2026 ta prepara pa celebra e pasado, presente y futuro di rock na Aruba, mientras cu ta contribui na mantene e escena musical local vivo.
