Durante su bishita na Hulanda, Prome Minister Mike Eman a reuni cu mr. Sybrand van Haersma Buma, vice-presidente nobo di Raad van State. Durante e encuentro, nan a intercambia pensamento riba e importancia di e instituto aki den Reino Hulandes, e participacion di Aruba y e necesidad pa tene cuenta cu e realidad y aspiracion di tur pais den Reino. Sybrand van Haersma Buma a asumi e funcion di Vice-Presidente di Raad van State riba 1 di juli 2026. Anteriormente, e tabata lider di fraccion di CDA den Tweede Kamer (Parlamento Hulandes) y Burgemeester di Leeuwarden.
Raad van State ta un instituto independiente cu ta duna conseho na Gobierno y Parlamento di Hulanda tocante legislacion y administracion publico. E instituto ta cumpli tambe e funcion di instancia general mas halto den husticia administrativo na Hulanda. Den cuadro di Raad van State di Reino, Aruba, Corsou y Sint Maarten tin nan propio representante den e seccion di conseho, cu ta trata asunto di legislacion y regulacion cu ta afecta e cuater paisnan di Reino.
Contribucion di Aruba na Raad van State
Prome Minister Eman a destaca e importancia di e contribucion cu diferente representante di Aruba a duna durante e ultimo tempo na Raad van State. Segun e prome minister, participacion di nos representantenan di Aruba den e instituto aki a contribui na un comprension mas amplio di e realidad y reto cu Aruba ta enfrenta como pais autonomo den Reino.
E participacion aki a yuda pa e proceso di formacion di pensamento y e consehonan di Raad van State tene mas cuenta cu e perspectiva di Aruba y e parti Caribense di Reino Hulandes, pasobra e experencia di Aruba no semper ta igual na esun di e parti Europeo di Reino.
Friesland y Aruba ta comparti algun experencia similar
Un otro punto cu Prome Minister Eman a destaca ta e origen di Sybrand Buma, cu tin su rais na Friesland. E prome minister a splica cu Friesland, como region den Hulanda, tambe conoce e reto di haci su bos wordo scucha den un sistema central di gobernacion. Segun Eman, e experencia aki ta crea cierto comprension mutuo entre Buma y Aruba, cu tambe ta aspira pa su identidad, interes y realidad wordo reconoci den e structuranan di Reino.
Eman a describi e encuentro como un combersacion agradabel y constructivo, den cual el a encontra comprension pa e aspiracionnan di Aruba y su vision riba un Reino cu ta duna espacio na e contribucion di tur su paisnan.
Reflexion riba e bon comun
Durante e combersacion, Prome Minister Eman y Buma a intercambia pensamento tambe riba e concepto di Common Good, of bon comun. E prome minister a destaca e importancia di sigui reflexiona riba e concepto aki, specialmente den relacion cu e modelonan economico y politico cu ta determina e desaroyo di nos comunidadnan. Segun Eman, e reflexion aki por contribui na identifica y corigi cierto deficiencia den e modelonan actual, pa asina crea mas oportunidad pa bienestar di pueblo. E encuentro a brinda oportunidad pa intercambia ideanan riba e tema aki y explora pensamento cu por contribui na un desaroyo mas ekilibra di Reino y su paisnan.
Prome Minister Eman ta entrega buki di 40 aña di Status Aparte
Durante e encuentro, Prome Minister Eman a entrega na Sybrand van Haersma Buma un ehemplar di e buki Volk van Veerkracht – 40 jaar Land Aruba, compila pa Rene Zwart y historiado Luc Alofs. E publicacion conmemorativo, realisa den cuadro di 40 aña di Status Aparte di Aruba, ta reuni contribucion di 35 representante di comunidad Arubano, cu ta reflexiona riba e desaroyo politico, economico y social di Aruba for di 1986. E buki ta inclui tambe recuerdo personal di 15 autor tocante e prome Prome Minister di Aruba, Henny Eman, kende a desempeña un rol historico den e proceso cu a conduci na Status Aparte. E publicacion ta brinda un oportunidad pa reflexiona riba e logronan di Aruba durante e ultimo 40 aña y e retonan cu nos pais ta enfrenta pa futuro.
Den delegacion di Aruba tabata presente Minister Plenipotenciario Mildred Schwengle, Director di Gabinete di Minister Plenipotenciario Shandra John, Secretario General di Ministerio di Asunto General Robert Candelaria y Secretaria di Conseho di Minister Indra Hassell-Duarte.
