Parlamentario di AVP, ing. Mike de Meza, a entrega awe diamars, 20 di october, un denuncia y keho penal contra director di Departamento di Impuesto (DIMP), mr. Luenne Gomez-Pieters. Hunto cu su casa, dokter Brigitte Every, e ta acusa e director di a presenta un denuncia falso y calumnioso cu, segun nan, a daña nan bon nomber y a obstaculisa su nombramento como minister.
E keho ta relaciona cu e denuncia cu Gomez-Pieters a presenta dia 23 di mei 2025 contra e pareha pa presunto irregularidad den nan declaracionnan di impuesto. Segun De Meza y su defensa, e director tabata dispone di informacion cu ta refuta e sospechonan, pero toch a acudi na Ministerio Publico.
Su abogado, mr. Desiree Croes, ta precisa cu e keho ta trata di lasterlijke aanklacht, valse aangifte y lasterlijke verdachtmaking: un acusacion calumnioso, denuncia falso y accionnan pa pone un persona falsamente bou di sospecho di un delito.
Pa De Meza, e paso di awe ta e cuminsamento di un lucha pa responsabilisa esnan cu, segun e, a atacha su integridad y esun di su casa.
Abogado: DIMP tabata conoce e hechonan y cifranan
Abogado mr. Desiree Croes ta sostene cu e defensa ta presenta prueba cu Gomez-Pieters tabata na altura di e hechonan y cifranan relevante prome cu el a presenta su denuncia na mei 2025.
Segun e abogado, cu e informacion ey e director por a conclui cu no tabatin nada sospechoso of castigabel den e asunto fiscal cu a forma e base pa e denuncia. Toch, segun abogado Croes, el a sigui cu e acusacion cu e meta di daña nomber di Mike de Meza y hacie no ministeriabel!
Den e keho, e pareha ta argumenta cu e denuncia original a laga corespondencia importante cu e defensa afo. Nan ta sostene tambe cu DIMP a mantene acusacionnan basa riba posicionnan cu e departamento mes ya a modifica.
Esakinan ta e acusacionnan cu De Meza, Every y nan abogadonan ta pidi Ministerio Publico investiga.
Un asunto fiscal cu a afecta su candidatura
E disputa ta relaciona, entre otro, cu e tratamento fiscal di un traspaso di accionnan di e compania Memco na aña 2009. Segun e denuncia original, e pareha no a declara e transaccion corectamente den nan declaracion di impuesto riba entrada di e aña ey, cu un presunto perhuicio fiscal como consecuencia.
De Meza y su defensa ta rechasa cu tabatin un intento pa sconde un beneficio imponibel. Nan ta argumenta cu e transaccion a forma parti di e reorganisacion di su interesnan empresarial pa e por a asumi un funcion ministerial.
E asunto fiscal a sigui persigui De Meza durante e proceso pa forma Gabinete AVP-Futuro despues di eleccion di december 2024. Mientras su candidatura ministerial tabata riba mesa, e screening y e caso penal cu a bin su tras a crea obstaculo pa su nombracion.
Ministerio Publico finalmente a yega na un acuerdo, un schikking, cu De Meza y su casa. Segun e informacion presenta, nan no mester a admiti culpabilidad y e caso penal a termina sin un tratamento dilanti hues. E acuerdo no ta un sentencia di absolucion.
Mike de Meza ta sintie su so
Fuera di e bataya huridico, Mike de Meza ta expresa un decepcion profundo cu e actitud di su mesun coleganan politico. Segun e parlamentario, Minister Presidente Mike Eman y Minister di Husticia Arthur Dowers a mantene un distancia grandi durante e periodo cu e y su casa tabata enfrenta e acusacionnan. E ta reprocha nan cu, hasta despues di e acuerdo cu Ministerio Publico, nan a opta pa keda keto.
Pa De Meza, e silencio ey ta doloroso. E ta sinti cu el a enfrenta e lucha pa su bon nomber y integridad practicamente su so. Pa ilustra su sentimentonan, e ta referi na e pensamento di Martin Luther King Jr. tocante e dolor cu silencio di amigonan por causa, mas aya di e desordo di enemigonan.
Ta pidi un investigacion independiente
Den e keho penal, Mike de Meza y Brigitte Every ta solicita cu Landsrecherche investiga e actuacion di e director di DIMP, bou di supervision di un fiscal cu no tabata involucra anteriormente den e caso contra nan.
Nan ta pidi pa sigura e dosier completo di e denuncia original y verifica cua documentonan e director a entrega na Ministerio Publico y cua el a laga afo. Tambe nan ta solicita investigacion di corespondencia y mensahenan relevante y pa tende e personanan involucra.
E pareha ta reserva su derecho pa reclama compensacion pa daño y pa inicia un procedimiento civil.
“Esaki no ta bay keda asina”
Mike de Meza ta laga cla cu pa e, e asunto no a termina cu e acuerdo cu Ministerio Publico. E ta considera cu e acusacionnan a afecta su famia, su reputacion y su futuro politico.
“Tur hende cu a haci malo na mi y mi casa lo mester paga p’e”, e ta expresa. Segun e parlamentario, a purba atacha e bon nomber y integridad di ambos y e no tin intencion di laga esey pasa sin consecuencia.
Mientrastanto, De Meza a retira su disponibilidad pa bira minister den e gabinete actual. Den su carta anterior na Mike Eman, el a vincula e decision principalmente na su desacuerdo cu e rumbo di gobierno tocante HOFA y proteccion di autonomia di Aruba. E ta sigui como miembro di Parlamento.
Nos no a logra haya un reaccion ainda di Luenne Gomez-Pieters riba e keho nobo. Lo mester warda awo pa un fiscal di Ministerio Publico tuma un decision si tin base pa un investigacion penal of no. Dia director di DIMP a entrega keho, den algun dia a acorda y a hacie sospechoso. Den caso cu Gomez bira un sospechoso oficial, automaticamente Minister Geoffrey Wever lo mester prohibi su entrada na tur oficina di gobierno pa por garantisa integridad di un investigacion husto.
Tocante Luenne Gomez-Pieters
Mr. Luenne Gomez-Pieters, MBA, ta un hurista y specialista den impuesto cu ta dirigi Departamento di Impuesto di Aruba (DIMP) desde mei 2015, durante gobernacion di Mike Eman. Prome el a traha na Ernst & Young. E tin un Master den Derecho Fiscal di Universidad di Groningen, un Master den Derecho Civil y un MBA di Universidad di Aruba, caminda e ta docente invita desde aña 2024. Como director, e ta encarga cu reorganisacion, digitalisacion y ehecucion di reformanan fiscal di DIMP. Prome cu a asumi e puesto di director di DIMP, e tabata coordinador di minister den Gobierno di AVP.
