Durante e debate den Parlamento tocante e Cuenta Anual di 2020, lider di fraccion di AVP, Jennifer Arends-Reyes, a enfatisa e importancia di trata e cuentanan anual atrasa pa Parlamento por haya un bista claro di con gobierno a gasta placa publico y cua les por saca pa futuro.
Arends-Reyes a reconoce cu tin un atraso considerabel den e tratamento di e cuentanan anual di Pais Aruba. A pesar cu e proceso no ta facil, segun dje, tin un plan pa inhaal e añanan atrasa.
“Pa Parlamento ta fundamental pa tin e informacion aki, aunke ta trata di informacion di despues, pa nos sa con e placa di e pueblo a wordo gasta”, e parlamentario a declara.
Gastonan extraordinario durante pandemia
Referiendo na e aña 2020, Arends-Reyes a indica cu tabata trata di un periodo excepcional pa motibo di e pandemia di COVID-19. Aruba a enfrenta gastonan extraordinario pa sostene e comunidad y e economia, entre otro mediante e loonsubsidie, cu a supera 300 miyon florin, y diferente fondo di emergencia.
“Tabata fondonan cu nos no tabata tin para y cu a crea debenan cu nos ta pagando te dia di awe”, Arends-Reyes a subraya.
Les pa futuro
E lider di fraccion di AVP a destaca cu e revision di e cuentanan anual no mester limita su mes na un analisis di cifranan, sino tambe mester brinda oportunidad pa evalua e decisionnan cu a tuma y identifica loke por mehora den e maneho financiero di gobierno.
Arends-Reyes a indica cu Parlamento mester haci e preguntanan necesario na e minister encarga, pa compronde con e procesonan por wordo mehora y prepara Aruba pa enfrenta un posibel crisis similar den futuro.
“Nos mester sa con nos lo anda si un crisis similar sosode den futuro, con e cuadronan legal lo wordo maneha y kico ta e lesnan cu nos a siña pa nos por bay dilanti”, Jennifer Arends-Reyes a conclui.
