Diadomingo dia 26 di augustus tabatin un concierto di kita sombre atrobe den Café Musical na Biblioteca Nacional na Playa, organisa pa Fundacion pa Hoben Talento Musical Donny Laclé.
E publico a gosa di loke nos musiconan a ofrece: bon musica, harmonia, colegialidad y profesionalismo. Addoncito Croes a haci su debut como maestro di ceremonia pa e conciertonan Dominical. Y manera nos ta costumbra di dje el a haci un bunita y bon trabou.
E concierto a habri cu presentacion di Tomás González. Cu su bos sonoro y romantico y compañando su mes riba guitara el a encanta su publico cu canticanan di diferente pais Sur Americano, manera Vals Peruano, Bosa, samba di Brasil, un tango di Argentina. Despues di Tomás a sigui Grupo Araguaney, cu su integrantenan Morela Rangel, (harpa), Sergia Betancourt (cuarta y cantante) y Mildred Martin (maraca) kende por cierto a toca cu nos pa ultima biaha ya cu e ta bay biba na Francia. Pues awe tabata su toque di despedida. Pa e ocasion di awe a compañanan un famoso tocado di harpa, Jhosayra Rojas, di Venezuela. Y diadomingo no tabata prome biaha cu el a laga nos disfruta di su tremendo talento musical. Tico Abreu, otro tremendo talento tambe a compaña Grupo Araguaney, tocando trompet, saxofon y bandolina cu ta algun di e 9 instrumentonan musical cu e ta domina. E publico a disfruta di diferente cantica conoci, entre otro Moliendo Café, Alma Llanera, Garza Blanca y tambe Abo so.
Den e ultimo parti di e concierto atrobe nos a haya bon cooperacion di nos gran amigonan Erick Uchtman (sinfonia di man), Bito Franken (guitara y cuarta) y Eric Ignaciio (guitara y bajo) integrantenan di Los 3. Y hunto cu Tommy Figaroa (percusion) y Chonai Farro (canto y precusion), nan a percura pa un dushi ambiente bailabel cu a pone nan publico riba pia, tocando canticanan manera: Toch mi sa, Chio, chio, chio, Caballit’i Don Alfredo y mas. Comision organisado ta gradici tur e artistanan aki pa nan contribucion impagabel. Y naturalmente, tur hende cu a contribui den e caha di donacion, mil y un danki. E placa aki ta pa un bon causa: e ta aporta na desaroyo musical di nos talentonan. Comision organisado ta invita tur hende for di awor caba pa e siguiente concierto cu no lo tuma luga diadomingo dia 30 di september, sino diadomingo 23 di september.
