N’e momentonan aki parlamento ta hopi den mal spot, segun presidente di e organo mas halto den nos comunidad, mr. Edgard Vrolijk.
El a sigui splica cu parlamento tin hende cu ta sospechoso, otro cu tin rumor riba nan. Tin otro cu tin otro caso den pasado, entre otro transporte di cierto cos ilicito.
Parlamento ta bou di tal berguensa, sin conta Caso Diamanta. Si mira bon, mester bay level up atrobe y ey t’e punto di discusion ta riba integridad, rib’e organo cu ta punta dede riba tur hende y tur minister.
Ey t’e fase cu tin cu traha duro y ta spera cu ora mishi e parti ey, pa e ora e parlamentarionan por haya consenshi tambe.
Cada ken sa nan cosnan kico nan ta, ta loke cu Vrolijk a bisa. “Unda bo subi bo ta hay’e,” papiando den direccion di prensa, agregando cu prensa tin e bon documenta y ta bon pa trece esaki den transparencia pa pueblo sa ta ken nan ta.
MESTER SCREEN FOR DI PRINCIPIO
Vrolijk a splica cu p’e statuut mester di ⅔ parti. E principal di esaki ta p’e partidonan politico, cu na nan turno tin cu screen nan hendenan.
Imagina un caso cu un candidato ta sospechoso den un caso penal, pero toch ta opta pa pone riba lista politico.
Si cuminsa na cada partido politico y haci un screening, por impedi tipo di berguensa aki. No por tira culpa riba ley ni statuut. Tin cu cuminsa tira culpa rib’e partidonan politico cu for di prome instante sa ken nan hendenan ta y scoge pa pone nan toch.
