Den combersacion cu presidente di Parlamento, mr. Edgard Vrolijk, el a indica cu e diesdos luna tra’i lomba tabata uno den cual a enfoca pa actualisa tur documento y proceso di Parlamento di Aruba; un obhetivo cu a logra y cu, por ehempel, cuminsando diamars 13 di september 2022 publico lo por mira documentonan casi den tempo real. E siguiente reto pa e entidad publico mas halto di Pais Aruba ta pa mehora e grado di presencia di parlamentarionan cu, segun mr. Vrolijk aworaki ta core den apenas 50% cerca miembronan di oposicion.
“E no tabata un aña facil; un aña yena cu reto. Bo ta drenta cu hopi animo y gana di core, pero na fin di aña bo ta siña tambe como presidente cu tin procesonan cu mester encamina, hopi biaha den man di ambtenaarnan, dus no den man di presidente. Pesey ta gradici e cuerpo di trahado di parlamento. Nan ta e exito cu awendia bo por wak cu tur cos ta na su luga,” asina presidente di parlamento a bisa indicando cu el a haya yega topa cu hopi documento y ley atrasa. Di diescinco ley cu a drenta, diescuater a pasa.
Segun mr. Vrolijk, e otro ta keda e presencia na trabou. E ta splica cu hopi biaha ta wak oposicion pidi reunion publico, pero ora bo wak nan ausente den 44% pa 50% di reunionnan publico, ta sorprendente.”Hopi biaha ta papia di pobresa, pero e homber pober ta paga bo salario pa bo ta akiden y bo no tin e decensia di yega,” asina mr. Vrolijk a expresa, enfatizando cu ta un asunto di moral, paso pa ley no por obliga e parlamentario di presenta.
