Hunto cu Karol Croes, tin tambe otro candidata cu tambe lo ta den e certamen di diadomingo awo. Ta trata di Kim Rossen, candidata di Miss Universe Curaҫao.
Rossen a indica cu e ta sumamente contento di e trato ricibi na El Salvador. For di dia cu el a yega e pais, e trato semper tabata uno cordial y yen di amabilidad. E atmosfera y e paisahenan, pero tambe e actividadnan cu nan a haya pa haci, p’e tabata e momentonan mas feliz di su bida.
Pa Miss Universe Curaҫao, e ta gosando inmensamente di su estadia na El Salvador, cu ta un pais rico na cultura. Su experiencia cu e ciudadanonan di e pais ta extraordinario, nan ta cla pa yuda. Tur e recuerdonan cu e lo bay cas cu ne, e lo tene nan cera di su curason y sigur e lo conta di e pais, cual p’e, ta un manera di lanta e turismo di e pais un poco.
CORSOU
Kim a sigui bisa cu e ta hayando hopi comentario positivo, cu ta curash’e, tambe for di Aruba. Sigur gradicido pa tur e palabranan di curashamento, cu ta dun’e energia tambe pa e sigui padilanti.
El a sigui bisa cu ta importante pa ta mentalmente prepara pa un certamen di e caliber aki manera Miss Universe hunto cu e disciplina.
Mester remarca cu Kim, Miss Universe Curaҫao ta un dama sumamente halto, cu ta midi 1.88m. Esaki ta hacie unico pa cual e ta hala masha hopi atencion mes na El Salvador. El a splica cu e ta bin di un famia halto y su haltura ta parti di ken e ta. Prome e no tabata mucho sigur di su haltura, pero ta tur e procesonan aki ta hacie ken e ta. Y e ta e haltura y e haltura ta e. Durante su entrevista cu e huradonan, el a splica di su pais, di con Corsou ta. Y sigur e tin un bon ‘feeling’ pa cu esaki.
PASARELA
P’e anochi preliminar, e ta haya cu e trainingnan a yuda hopi, ya cu bo sa kico pa spera. Como un persona cu ta gusta structura, cual ta algo cu su persona, como deportista, ta gusta prepara su mes lo miho posibel. Y tambe e ta enfoca pa medio di meditacion, oracion como un persona creyente, e ta preparando pa bay saca cara di e islanan ABC.
Por ultimo, Kim a bisa cu e ta gradicido pa tur e apoyo ricibi, tanto di Corsou pero tambe di Aruba. E ta contento di por representa e idioma Papiamento.
E cobertura di Miss Universe for di San Salvador ta wordo presenta exclusivamente pa Dufry cu un tremendo sale na su tienda den Caya Principal y su RED App unda bo por spar y usa punto. Tambe Setar NV awor cu Data y yamada den un solo plan, Hybrid cuminsando for di Afl.55 cu 15GB di Data.
