Awo cu tin e fecha di 8 di mei poni pa tratamento di e concepto di ley di matrimonio di mesun sexo, pueblo ta puntra si e reunion tuma luga, mirando cu tin diferente parlamentario cu no ta di acuerdo cu esaki.
Manera por corda, den pasado recien, debi na ausencia di e parlamentario di RAIZ Misha Raymond, kende ta un di esunnan cu a firma e concepto di ley di matrimonio di mesun sexo, no por a trata presupuesto di TPEF (Tourism Product Enhancement Fund).
Un di e preguntanan cu a bini dilanti ta si MEP ta bay apoya e concepto di ley aki of no dia 8 di mei awo, fecha cu a pone pa e tratamento. Contesta di Raymond tabata “si esey ta e punto, nos como fraccion mester papia e ora kico ta nos paso siguiente.
Banda di esaki, pa e reunion tuma luga mester tin quorum. A puntra Misha Raymond den e conferencia di prensa si e ta sigur cu MEP lo yuda cu quorum pa e reunion tuma luga. El a cuminsa pa bisa cu e ley aki no ta uno di gobierno pero di Parlamento. Pa cuminsa tin tres persona di oposicion cu a firma e ley y esey ta nifica cu nan lo apoya e ley. “Ami no ta pensa cu lo no bay tin quorum e dia ey. Ami ta bisa yama e reunion y nos lo mira con e parlamentarionan lo anda e dia aki cu e ley mester wordo trata.
A recorda cu e ley di iniciativa aki tin apoyo di su persona, di Miguel Mansur, Aquannette Gunn y Marisol Tromp.
Si e ley no haya apoyo di MEP, e ta bisa, nan ta demostra con nan posicion ta pa cu e tema. El a pone hopi enfasis cu e no kier bay riba suposicionnan y mantene su mes na loke tin estableci, esta cu tin un fecha pa trata e ley. Ta keda na cada parlamentario con nan ta bay atende cu e reunion, y mas cu tur cos con nan ta bay vota.