Minister Xiomara Maduro a haya bishita di Mariël Willems

Mariël Julia Willems, conoci como Mariël a nace na Aruba y tin 20 aña di edad. Recientemente Mariël a participa den e ‘7th International Young Chef Olympiad 2021’ (IYCO), e competencia culinario virtual di mas grandi di mundo caminda cu hobenan di mas cu 50 pais a participa. Pa por a participa den e competencia aki, Mariël a pasa prome den un competencia na e skol cu e ta bishita, esta e ‘Business & Hotel Management School’ (BHMS) na Lucerne, Switzerland. Den dicho competencia, Mariël a gana e prome lugar dunando e asina e oportunidad pa representa su scol den e competencia culinario virtual. Akinan ta caminda cu Mariël a logra keda den e top 10 di e competencia aki.

E di 7 edicion di e ‘International Young Chef Olympiad’ ta e competencia culinario di mas grandi di mundo pa esnan cu ta studiando pa bira chef. E competencia aki ta wordo organisa pa e International Institute of Hotel Management (IIHM) hunto cu e International Hospitality Council (IHC). Den e competencia di e aña aki a participa mas di 50 pais, entre otro paisnan manera Spaña, Canada, Suisa, Italia, Hong Kong, New Zealand, Thailand, Sur Korea, Turkia, Sweden pa menciona algun. Tur aña e competencia aki tin un tema diferente y e aña aki e tema tabata ‘Forward Together’ pa asina encurasha e mundo culinario pa traha hunto pa un causa comun, esta e proteccion di medio ambiente por medio di accionan positivo. E tema a wordo escohi pa pone enfasis riba e hecho cu den e pandemia aki ta solamente hunto por bay dilanti y cu ta hunto so e mundo di hospitalidad lo por progresa. 

Mariël (20) a bishita Colegio San Antonio MAVO y aki ta caminda cu e tabata sa caba cu e tabata kier a bay den e direccion di arte culinario. Despues di a caba Colegio San Antonio, Mariël a sigui pa Colegio EPI caminda cu den 3 aña el’a logra obtene su Associate Degree of Applied Science in Culinary Arts. Na un edad relativamente hoben, Mariël tabata sa caba cu esaki ta su pasion y e direccion profesional cu e kier sigui. Ta pa e motibo aki, durante su tempo na Colegio EPI, Mariël a traha duro y a pusha su mes mas cu e tabata por pa e por gana tur experiencia den arte culinario, preparando su mes asina pa ora e bay studia afor. Tur su esfuersonan ta refleha den su participacion na e di 7 edicion di e International Young Chef Olympiad 2021 caminda cu el’a sa di demostra cu tur cos ta posibel si bo traha duro y sigui locual cu ta bo pasion. 

Como muestra di aprecio pa su participacion y logro Minister di Cultura Xiomara Maduro a entrega un obsekio na  Mariël Julia Willems y a desea su persona hopi mas exito pa futuro.