Directiva di Partido Patriotico di Aruba (PPA) ta considera necesario pa expresa publicamente su posicion despues di e sentencia di HOF den e caso di Otmar Oduber y e proceso cu ta continua via e camindanan legal corespondiente.
Despues di e veredicto di HOF, directiva di PPA a hiba un combersacion cu Sr. Otmar Oduber y el a pidi directiva 2 siman p’e por tuma un decision segun nos Estado di Derecho pa bay casacion y sigui busca su derecho. Directiva a dun’e su espacio y mientrastanto nos sa ki decision Otmar Oduber a tuma.
PPA ta respeta e institutonan di Estado di Derecho y naturalmente ta respeta e veredicto dicta door di corte apelacion pasobra, respeta un decision di corte ta un obligacion institucional y democratico.
Na mes momento respeta un veredicto no ta nifica cu un persona, un partido politico of un organisacion mester renuncia na su derecho di por expresa cu e no ta comparti e conclusionnan den e sentencia y cu e ta considera legitimo y husto pa cana e caminda legal disponibel pa defende su posicion.
Otmar Oduber a declara publicamente cu e ta respeta e decision di huesnan, pero cu e no ta accepta y ni considera e decision uno husto y cu e lo continua su defensa y buskeda di su derechonan mediante corte di Casacion. PPA ta reconoce y ta sostene su derecho den esaki.
Pa nos organisacion, e situacion aki nunca lo por elimina e trayectoria politico di su persona ni e sosten cu su persona a ricibi di miles di ciudadano na urnanan electoral. Den e ultimo eleccion na december 2024, Otmar Oduber a obtene un cantidad di 2.419 voto personal, siendo e candidato di PPA cu mas voto personal y e di seis vote getter di ful Aruba, mientras cu e partido, como organisacion, a optene 3.538 voto, bon pa un asiento den Parlamento despues di un ausencia di 20 aña den e instituto legislativo di Aruba.
PPA ta considera importante pa separa tres elemento for di otro cu no mester ta confundi: respet pa husticia, derecho pa defende y e posicion politico di un persona of un partido.
Nos organisacion como partido politico desde un inicio tabata sa cu Otmar Oduber tabata den su proceso pa busca su derecho, pa defende y limpia su nomber den corte y nos a sostene e tempo ey caba p’e por ta parti di PPA y bira lider politico riba lista di PPA. No ta nos so a pensa asina, sino pueblo tambe a sostene Otmar Oduber y PPA masalmente. Awe nada a cambia, nos lo sigui sostene Otmar Oduber durante e siguiente etapa cu ta sigui, caminda e lo sigui busca su derecho, respetando na mes momento e institutonan y e procedimentonan estableci pa ley.
Nos no ta pidi privilegio. Nos no ta pidi impunidad. Nos ta defende un principio fundamental di cualkier sociedad democratico: esta cu tur persona tin derecho pa defende su mes, pa cuestiona huridicamente un decision y pa percura cu su caso ta trata conforme e garantia cu e ley ta establece.
PPA lo sigui e siguiente pasonan di e proceso cu hopi atencion y lo mantene nos sostenedonan y e pueblo di Aruba informa na un manera responsabel.
