Diamars mainta e comision encarga cu soluciona e problematica di desperdicio likido na Aruba a presenta un update di e proceso cu ta andando pa yega na un RWZI nobo. E proyecto ta den un estado hopi avansa y ta premira cu e trabounan di construccion lo por cuminsa den zomer.
E problema di e planta di RWZI na Bubali no ta algo nobo y e ta un problema mas grandi cu simpel holo desagradabel. E ta un peliger pa nos salud, naturalesa, turismo, nos economia y e calidad di bida di nos hendenan. Den e programa di Gobernacion pa 2021-2025 a pone como meta pa crea concientisacion di e urgencia di e problematica aki y bin cu solucion sostenibel.
E planta na Bubali ta data di 1972 y e tempo ey a diseñ’e pa sirbi un cierto cantidad di habitante. E tempo ey ta 60 mil hende ta biba na Aruba y 50 aña pasa ningun hende a pensa cu Aruba lo a conoce un desaroyo explosivo den cantidad di camber di hotel y cu esaki lo a haci cu e planta ta bira chikito p’e capacidad di awa cu e mester procesa.
Tambe tin un hospital grandi cu a drenta den funcion solamente algun aña despues di e planta di RWZI. Cu tempo e desaroyo economico di nos isla a bay laga desaroyo di infrastructura atras. E planta a bira chikito p’e volumen di desperdicio likido cu e mester procesa y su estado di mantencion a keda bay atras pa hopi aña pa motibo di falta di recurso financiero.
Durante e reunion cu e comision por a scucha for di e comision encarga cuanto trabou a haci den e ultimo añanan pa yega na un solucion structural pa tur esaki y cu e proyecto awo a drenta den un etapa hopi avansa y e ta cla pa ehecuta.
E comision menciona a presenta na AHATA, ATSA, FPNA, DNM y tambe na gerencia di Amsterdam Manor e detayenan di tur loke ta e plan, e trabounan cu a haci caba, kico falta y den ki tempo ta pensa cu lo por keda cla. E comision ta lidera pa Jossy Figaroa, apunta pa Ministerio di Naturalesa, hunto cu Marlon Croes, director di DOW representando despacho di Minister Presidente y Ton Rojer di Utilities Aruba NV, cu ta parti di e carta di Ministerio di Energia.
Meta ta pa logra privatisa henter e sistema di desperdicio likido na Aruba. Pa medio di un entidad priva por sigura e inversion multi-miyonario cu ta necesario pa Aruba yega na un sistema moderno pa reemplasa e sistema chikito cu mientrastanto ta 50 aña bieu.
Gobierno ta preparando pa traspasa tur planta di RWZI y tambe tur sistema di rioolering p’e entidad nobo aki. Dentro di 18 pa 24 luna Aruba lo ta ehempel den Caribe cu un sistema completamente nobo y moderno riba e tereno di desperdicio likido.
Hunto cu e sistema nobo lo introduci tambe un ‘regulatory framework’. Esaki t’e regla- y normanan cu e planta y e sistema di rioolering mester cumpli cu’ne. Cu esaki lo por monitor cu tur cos ta bay conforme standard y evita cu e planta nobo ta cay atras den e servicio cu e mester duna comunidad.
Den programa di Gobernacion 2021-2025 tambe a indica cu lo busca un plan sostenibel pa conserva y integra e 5 saliña ‘wetlands’ en conexion cu RWZI-Bubali. Esaki awo ta parti integral di e areglo cu e operador nobo. Nan lo tuma e responsabilidad pa tene e nivel adecuado di awa den e Western Wetlands, p’asina yuda fortalece y stimula nos flora y fauna den diferente oasis chikito n’e luganan cu awe ta saliña seco. Esaki na su turno lo yuda tambe diversifica nos producto turistico.
