Despues di a organisa dos edicion exitoso di ‘Foro Nacional pa Adulto Mayor’ na october 2023 y maart 2024, Minister Ursell Arends, den colaboracion cu Directie Ouderenzaken, awor ta compartiendo un resumen di e eventonan aki pa tur esunnan interesa. Durante ambos edicion, mas cu 100 participante a reuni pa intercambia e ideanan y conocemento tocante e esfuersonan actual pa trata cu e reto- y oportunidadnan di enbehecimento.
E Foro Nacional pa Adulto Mayor tabata organisa pa explora e solucionnan sostenibel y pa mantene e lasonan entre varios grupo di interes. Durante e eventonan a hiba discusion y a presenta e recomendacionnan pa mehora e calidad di bida di nos adultonan mayor.
Minister Arends y Directie Ouderenzaken a compila un resumen di e Foro Nacional pa Adulto Mayor den forma di un rapport. Den esaki ta documenta e discusion- y acuerdonan cu a tuma luga. E rapport aki ta propone pa comparti e resultadonan di e combersacionnan continuo di e Foro Nacional pa Adulto Mayor pa sigura transparencia. E meta ta pa tene pueblo informa, delineando e paso- y acuerdonan cu tabata haci durante e foro. Esaki ta inclui e firmamento di e “Convenio Nacional” cu ta pone un base solido pa cooperacion y futuro colaboracion. Ademas, ta elabora riba e lansamento di e ‘Proyecto Pasadia,’ cual ta enfoca riba alivia e presion pa e adultonan mayor ariba e lista di espera di SABA.
“E perspectiva- y recomendacionnan ricibi durante e Foro Nacional pa Adulto Mayor ta esencial pa sigui desaroya maneho y e iniciativanan cu ta enfoca ariba e necesidadnan di nos adultonan mayor. Nos tin un compromiso pa implementa e recomendacionnan pa sigura cu tur adulto mayor na Aruba por disfruta di un bida di digno”, Minister Ursell Arends a menciona.
Por haya e rapport ariba publico.aw/rapport, tambe por mira e entrevistanan cu e orador- y invitadonan, e presentacionnan di e evento completo di e Foro Nacional pa Adulto Mayor riba e pagina di Facebook di Directie Ouderenzaken.
