Sea e recherche ta gaña of e Minister di Husticia, Rocco Tjon ta gaña. Ta relaciona cu e caso di Nigel Maduro, unda cu a spuit riba atraccionnan turistico: NO MORE HOTELS. A start un investigacion p’asina saca afo ken lo a spuit. Por lo menos, e recherche cu a investiga e caso a traha un proces verbaal bou di e titulo: “Melding Bureau Minister Justitie & Sociale Zaken”.
Ey e recherche a indica den su procesverbaal cu riba 29 di september 2023 pa 09.45 am, el a ricibi un WhatsApp y djey un yamada di un personal di e Ministerio di Husticia y Asuntonan Social, caminda ta indic’e pa pura y of duna prioridad n’e investigacion relaciona cu e spuitmento di NO MORE HOTELS. Hasta e recherche a pone riba papel cu e coordinado di Minister Tjon a laga sa cu e sospechoso lo ta ruman di Desiree Croes.
E procesverbaal aki a keda scondi pa varios tempo. Pero recien, manera a hacie publico, a puntra e Minister di Integridad, Ursell Arends, riba e comportacion di Minister Tjon of su trahadonan door di pone presion directo riba polis pa investiga un caso specifico. Claro, esaki no ta un actuacion integro y mucho menos ta cuadro cu nos estado di derecho.
Arends, a priminti cu lo pone su mes bon na altura di e caso y cu e lo yama su colega, Rocco Tjon aden pa atende cu ne riba e caso no integro aki.
Diasabra atardi Minister Tjon a sali pa madre patria, Hulanda. Durante un entrevista exclusivo cu e mandatario, representante di 24ora.com a puntr’e riba e caso aki. Tjon a indica cu e no ta na altura di e caso y e por sigura cu ni e como Minister di Husticia y mucho menos un personal di su bureau a yama pa pone presion pa duna prioridad pa investiga e caso di Nigel Maduro.
A splica Tjon si, cu e recherche a pone preto riba blanco cu un personal di su ministerio a whatsapp y yama pa pone presion. Na un di dos ocasion Tjon a bisa: “Mi por garantisa bo ni ami ni hendenan di mi bureau a pone of por pone presion”. Riba e punto cu minister Arends a bisa cu lo sinta cu Tjon pa atende cu e caso, e propio Tjon a indica cu ningun rato so, su colega a acerc’e pa papia riba e topico aki.
