Nunca tabatin algo contra e compania Colombiano Sociedad Aérea de Ibagué (Sadi SAS), cu ta doño di e helicopter cu Aruba ta lease. Pero pa trankilidad di tur hende e minister a bisa cu el a pidi presidente di parlamento yama un reunion pa e por duna informacion.
Minister di Husticia Rocco Tjon a haya su mes obliga di yama un conferencia di prensa pa papia riba e tema di helicopter. Tin publicacionnan na Colombia cu ta papia cu Carlos Eduardo Restrepo Osorio, cu kende a firma e contracto di lease, ta doño di e compania y a haci actonan contra ley pa cual awo e ta den man di husticia Mericano. El a entrega su mes na Drug Enforcement Agency (DEA) relaciona cu un confiscacion grandi di droga haya den un avioneta di dje.
Den e conferencia di prensa Tjon a indica cu a ricibi den e transpaso tur e documentonan for di ex-minister Bikker y a lesa tur loke cu a haci, con e procedura a bay y ki informacion a busca. Tur cos tabata na ordo. Sinembargo e no tabata kier a bay den mucho detaye riba e tema aki, pasobra el a pidi un reunion di parlamento pa suministra tur informacion na e representantenan di pueblo.
Mester remarca cu berdad presidente Vrolijk a yama un reunion pero lamentablemente e bijeenkomst aki lo ta porta cera. Esaki ta nifica un falta di transparencia, pasobra tin derecho di sa y mira pa nan mes con e mandatario ta splica of defende su mes riba e tema aki.
Tambe den e conferencia di mainta Tjon a bisa cu el a ricibi tur documento cu ta mustra cu e compania tabata na ordo cu tur nan asuntonan. Tambe el a menciona cu e persona nunca tabata doño ni shareholder. E tabata solamente un ehecutivo comercial y den cuadro di e posicion ey cu e tabata ocupa, el a bini Aruba e tempo aya. Pues e no ta doño. Na december 2020 el a finalisa e relacion laboral cu Restrepo pasobra el a bay dedica su mes na otro negoshi.
Den cuadro di e sucedido aki, e ta bisa cu e ta na fabor di un otro tipo di ley, cu ta permiti nan bay den un forma mas profundo, inclusive riba trahadonan (ehecutivonan) di un compania manera den e caso aki. Pero den e procedura di helicopter, tur cos a cana bon.
Ademas, e sucedido di droga, ta algo cu a sosode na 2021.
E compania Sadi mes ta cumpli cu tur rekisitonan di e contracto y lo demostra esaki tambe den e reunion. A haya informacion di Ministerio Publico y Ministerio di Defensa, cu ta bisa cu e doñonan ta cumpli cu tur cos y no tin nada di investigacion contra nan.
