Minister di Desaroyo Economico na Corsou, Ruisandro Cijntje ta afirma cu pilar economico di turismo ta creciendo na Corsou. Como miembro di Caribbean Tourism Organization (CTO) Cijntje ta splica su coleganan minister regularmente cu en realidad den Caribe no mester competi pero mas bien coopera cu otro.
“Den Caribe nos tur tin solo, santo y lama. Loke nos tin cu haci ta coopera cu otro pasobra cada un tin su propio sabor.” Cada isla ta distinto y mester crea un interconectividad den Caribe,” segun Cijntje, y di e forma aki e turista por biaha entre e islanan y haya e experiencia cu cada isla ta ofrece. E mandatario ta haya cu si nos por coopera mas cu otro, henter e masa cu ta bin direccion di Caribe tur hende lo por probecha di esaki hunto y crece den union.
Corsou aworaki ta agresivo berdad pero e agresividad ta riba e cambio den mercadeo cu ta mucho mas tangibel cu hende, e conectividad y calor humano. “Anto esey ta visualisa cu borchi, revista. Awo nos ta mucho mas ‘out there’ cual ta pone e visibilidad bira mas grandi,” segun minister Cijntje kende ta afirma tambe na mes momento cu tin bon relacion y ta coopera bon. Pasobra con cu bay bin Aruba tin hopi experiencia den esaki cu hopi aña, un Isla cu ta hopi avansa riba e tereno ey y Corsou ta siña for di esaki pa hacie tambe di mes manera pero diversificando e economia.
Awo a recupera, crece y crea hopi cupo di trabao despues cu a keda afecta grandemente tambe di e pandemia na Corsou. Awor cu e economia ta draai, nan ta trahando riba National Export Strategy, Food Security, como tambe e parti di coriente y mas. “Nos ta trahando riba e puntonan menciona pa crea un economia mas resiliente y mucho mas stabiel, y diversifica.”
Minister Cijntje ta bisa cu e ta trahando hopi duro cu su coleganan di Aruba y Boneiro unda tambe a palabra cierto cos cu lo bay haci hunto. Den mundo di crucero por ehempel ta papiando caba di e Dutch Caribbean Experience, unda a keda di bini hunto un bes mas pa sigui papia y desaroya.
E conexion di ferry entre e islanan tambe ta algo cu e mandatario tin den bista hunto cu su otro coleganan. Lo sigui traha riba esey pasobra e relacion di hermandad di famia cu ta eherce entre e tres islanan ABC ta hopi fuerte. “Anto mi ta kere nos tin di bay bek pa fortifica e conexionnan ey.” Banda di esey e mandatario ta subraya cu nan ta mira Corsou su aeropuerto ta hayando mas vuelo y nan ta trahando duro pa sigui conecta Corsou cu resto di mundo.
Aruba tin un bentaha asina grandi riba Corsou den esaki y Corsou ta siñando di tur esaki tambe pa asina pone e isla riba mapa. E ta bayendo hopi bon, y ta creciendo fuertemente y lo tin cu wak con ta sigui cu e desaroyo aki manera tambe expandiendo desaroyo di nan aeropuerto.
