Parlamentario independiente Gerlien Croes a pone un serie di pregunta riba papel. Den e preguntanan aki por nota su preocupacion pa cu otorgamento di precario. Un preocupacion cu probablemente ta bini di e “sobrepoblacion” di turismo cu por “overkill” e producto Aruba. Pero tambe tur e consecuencianan cu esaki ta trece cu ne pa loke ta e espacio riba beach cu ta bay pa tent of kiosko di propaganda, restaurant of pa pone palapa y stoel specificamente pa e huespednan di e diferente hotelnan.
Tur esaki a pesar cu ta poni specificamente den ley cu tur beach ta publico, den practica e ta resulta tin biaha diferente.
Pa algun tempo (aña) caba e poblacion a bin ta expresando su mes contra mas hotel y aunke cu e ultimo gobierno ta nenga di a duna mas permiso nobo, ta keda un straño con por a permiti un permiso duna den pasado por keda drumi un kwart siglo prome cu e activa y uza net awo cu e pueblo ta sinti cu e ta sobrepobla pa hotel y haciendo e economia mas vulnerabel.
Den e serie di pregunta Croes, kende ta un parlamentario independiente, ta pone e departamento y e ministerio cu ta cay bou di Prome Minister mr. Evelyn Wever Croes, pa mobilisa pa haya informacion. Ta conoci cu e sistema di infrastructura no ta esun mas moderno ni mas up to date. Otorgamento di entre otro precario mes ta atrasa, segun por a compronde for di diferente caso cu tin den corte.
A haci e preguntanan aki dia 8 di april ultimo y no a haya contesta ainda.
“Relaciona cu e desaroyo infrastructural y construccion di hotelnan y uzo y maneho di nos beachnan actualmente y pa futuro, suscrito kier a dirigi e siguiente preguntanan na Ministro Presidente”
1. Minister por comparti cu Parlamento di Aruba e cantidad di peticion pa precario cu tin actualmente incluyendo e fechanan di peticion pa permiso pa entre otro pone strandstoelen, palapas, kleedhok, towelhut, massagehut, toilet, opslagruimte, lunchdecks, bars y otro actividadnan ariba beach incluyendo e zona di peticion y cantidad di meter cuadra?
2. Minister por comparti e lista di precario honra desde januari 2014 te cu maart 2024, cu referencia di e zona y cantidad di m2 honra?
3. Minister por entrega un lista separa di e peticionnan pa precario haci specificamente door di e hotelnan na Aruba incluyendo fecha di peticion desde 2014 te cu maart 2024? 4. Minister por specifica e cantidad di precario honra na hotelnan (individualmente) cu e grandura di e zona y e fecha cu esakinan a wordo otorga y/of a extende e permiso desde januari 2014 te cu maart 2024?
5. Minister por comparti e maneho di DIP cu tawata tin pa cu nos beachnan “strandbeleid” desde 2014 te cu maart 2024, incluyendo e cambionan specifico cu tawata tin den e maneho durante e periodo aki?
6. Por informa con e proceso di maneho di pone palapa ta encamina y ken ta encarga cu pone esakinan y ken ta responsabel di e maneho di esakinan?
7. Por informa si e maneho di palapa ta varia pa vergunning?
8. Por lista individualmente e precarionan duna pa palapa so y ken ta responsabel pa maneho di e palapanan den e zona (nan) specifico aki?
9. Por lista individualmente e precarionan duna pa stoelnan di lama duna na hotelnan y otro companianan di watersports?
10. Por inclui un mapa cu por duna un bista na Parlamento di Aruba ariba e reparticion di tereno ariba nos beachnan pa cu e permisonan duna y vigente actualmente na tur nos beachnan rond di Aruba?
11. Minister por comparti cu Parlamento di Aruba e lista di opcionnan cu e ser duna desde januari 2009 te cu maart 2024 pa construccion di hotel y condominium incluyendo e fechanan di peticion y fechanan cu a duna e opcionnan aki?
12. Minister por inclui un e lista di e acuerdonan firma pa tereno di construccion di hotel cu a honra for di e opcionnan otorga den e periodo menciona incluyendo e fecha cu e acuerdonan a ser firma desde januari 2009 te cu maart 2024 ?
13. Por informa Parlamento cual ta e plan pa locual ta uzo y peticionnan di precario cu lo por ser haci pa e hotelnan den construccion na Noord y tambe San Nicolas?
14. Minister por informa kico ta e acuerdo cu e siguiente hotelnan specificamente den e siguiente lista cu ta den construccion tocante e futuro uzo di nos beachnan?
St. Regents 200 camber extra pa december 2024; Grand Ibero Star (1) 240 camber december 2024 Grand Ibero Star (2) 400 camber pa 2025 Ibero Star Tierra del sol 200 camber 2025; Expansion Hilton 160 kamber pa 2025; Port City 2x Boutique Hotel cu maximo 100 camber cada un. Secrets Hotel San Nicolaas: Fase 1 & 2 totaal 900 camber; ampliacion Manchebo hotel 100 camber; amplicacion Divi Phoenix di 140 camber; total otro 741 unit condominium bou di construccion actualmente.
Croes ta bisa di ta desea pa haya contesta por escrito riba tur su preguntanan.
