Ta conoci cu Minister di Energia, Glenbert Croes ta biahando rond mundo, buscando manera pa yega na un solucion pa por baha e tarifa di awa y coriente. El a bay Spaña, Ecuador, Merca y sin nunca a bin cu resultado.
Recientemente Minister Glenbert Croes a trata di dal pueblo cu un otro tubo ora el a caba di regresa for di Merca cu e logro di heavy fuel oil, pero mientras tanto Merca a pone e sancion bek contra di Venezuela. E minister por wel di lubida riba e heavy fuel oil for di Venezuela. Unda e minister aki touch tera e ta trece problema.
E ministro di Labor, Energia & Integracion a bay Ecuador pa negocia pa heavy fuel oil. Na Ecuador e minister encarga cu asuntonan di petroleo mester a retira pa via di problema. Nos por corda cu ora e minister tabata parlamentario a trece Citgo Aruba y asina cu el a drenta gobierno e minister a core cu Citgo y riba dje regal’e 175 miyon di dollar. Na december 2020 e minister aki a trece Quanten Consortium Aruba & Eagle LNG cu lo inverti 3.5 biyon di dollar pa renoba nos refineria.
No a tarda mucho cu e minister a pone Quanten Consortium divorcia for di Eagle LNG. Despues gobierno a core firma na april 2021 cu Eagle LNG y a hinca WEB NV den un aventura. Te cu dia awe e contract ta scondi. No a tardi mucho cu WEB NV tambe a confronta problema ora e motor di RECIP 7 a pega candela. Situacion na WEB NV ta keda delicado paso lo tarda 6 luna prome cu por pone e planta bek den funcion. Cu un minister asina nos pueblo no lo tin speransa cu awa y electricidad lo baha.
Minister Glenbert Croes ta pio cu Agustin bad luck. Unda e bay ta problema so ta keda atras. Ela a yega Aruba e siman pasa y mester a atende un reunion den parlamento encuanto DIMAS. Nos mester corda cu e minister a hasi bida di e director di DIMAS imposibel pero ni kico cu e minister a haci el a perde tur su casonan dilanti hues. Mientras tanto e maneho di DIMAS ta un desastre pa via cu hopi stranhero no ta haya nan permisonan na ordo.
Segun informacion cu nos a ricibi cu e minister ta firma permiso sin cu e permiso tin fecha cu e ta caduca. No tin un control riba dunamento di permiso. Den kico e minister aki a hinca nos isla aden? Parlamentarionan a scapa e minister aki contra e mocion di desconfiansa. Hotelnan ta papia cu mester di 16 mil trahado pa traha den hotel. E 16 mil trahadonan aki ta haci cu aki na Aruba tin mas stranhero cu yui di tera ta traha. Riba dje no tin un clima faborabel pa nos yiunan di tera bin for di Hulanda.
Nos no mester lubida ora cu cruceronan tabata aden y no tabata tin luga pa pone hende na nos beachnan. Nos ta corda e problema cu tabata tin? Gobierno no ta cuida e galiña cu ta pone e webo di oro esta nos turista. Nos no por sigui den e direccion aki paso nos lo perde e saco y e cangreu.
Otro informacion cu nos a ricibi cu gobierno tin pensa di hisa edad di pensioen pa 67 aña. Esaki tambe ta e plan diabolico di Desaroyo Sostenibel cu nos gobierno tin duro brasa. Nos por corda den campaña e minister a gaña Monty cu partido MEPden gobierno lo di baha edad di pensioen na 62 aña prome cu aña caba mientras tanto a paso 7 aña. Pober Monty a haya dax den wowo.
Hopi tristo pa nos mira con nos isla a wordo goberna den e ultimo 20 añanan. E ultimo 4 aña gobierno a haya mas cu 2 biyon florin extra y ainda ta busca 160 miyon dollar fia den exterior. Nos tin un gobierno di desastre cu ta sigui zink nos isla. E proximo gobierno ta bay topa cu un isla mega debe.
Pa corona AZV ta papia di un surplus mientras nos grandinan mester paga pa nan remedinan. Hopi tristo. Esaki ta salud di calidad??? E Dios di husticia ta aki caba y esaki no ta tempo di e politiconan sino esaki ta tempo di Dios cu lo caba cu inhusticia. Dios su tempo ta perfecto. Solamente cu sabiduria di Dios nos isla lo lanta cabes y esunnan cu ta contra leynan di Dios no tin solucion. Partido Curpa e unico alternativa.
