Despues di a haci tur intento na Aruba, pa purba convence Gobierno di Hulanda pa duna nos espacio y e posibilidad pa hiba un bon dialogo na Aruba mes riba e condicionnan cu Hulanda ta impone pa asina Aruba haya e fiansa pa e di tercer tranche, Premier mr. Evelyn Wever-Croes a dicidi di subi avion y bay Hulanda pa atende e reunion di Conseho di Minister di Reino diabierna awo. Ey tin riba agenda e condicionnan pa e derde tranche pa e paisnan den Reino.
Na su salida, Minister Presidente a enfatisa cu e ta bayendo cu sentimiento hopi patriotico. Meta di su bishita ta pa por dialoga cu Hulanda, pa purba logra cosnan cu nos no por logra for di Aruba. Te ainda nunca a dialoga riba e condicionnan cu awor ta riba mesa, pa cual e prome mandatario ta considera masha importante pa por haya un oportunidad pa presenta e posicion di Aruba riba e tema aki.
El a bisa di no tin problema cu e reformanan cu Hulanda ta presentando pasobra Aruba mes tin un plan cla pa reforma nos sistema fiscal. Pa Gobierno di Aruba e problema ta e hecho y e forma con Hulanda kier implementa e condicionnan riba nos. Minister Presidente a bisa cu awe ta un dia masha special pa su famia, cu sentimientonan mixto e ta subi avion pa Hulanda, pasobra e ta consciente cu e tipo di situacionnan asina ta bin cu e trabou di Minister Presidente.
