Diamars, 10 september a tuma lugar den cas di Sint Maarten na Den Haag un evento organisa pa Minister Plenipotenciario  Jorien Wuite. Tambe tabata presente Minister Plenipotenciario di Corsow Anthony Begina, varios empresario Hulandes y representante di RVO, BZ.

Durante e evento Minister Plenipotenciario Jorien Wuite a elabora riba e desaroyo positivo tumando lugar na Sint Maarten despues di horcan Irma. Alabes a infatisa e motibo pa organisa “Smile Event” cu ta pa atrahe mas empresario Hulandes pa inverti na Sint Maarten. Na final a invita tur compania presente pa participa na “Smile Event” cu lo tuma lugar 25-26 oktober proximo na Sint Maarten.

Durante e evento Minister Besaril tabata tin e oportunidad pa intercambia cu e empresarionan Hulandes riba e Economic Policy di gobierno Wever-Croes. E vision economico di Gobierno ta enfoca riba  turismo, economia di conocemento, logistica, sector primario, economia circular y industria creativo/ cultural manera arte y musica, diseño grafico.Di es forma aki a mustra cu Gobierno Wever-Croes  ta enfoca pa crea mas cupo di trabao pa  hisa calidad di bida di esnan na Aruba.

Minister Besaril a combersa tambe cu presidente di “Ondernemend Nederland ONL” Hans Biesheuvel riba posibilidad pa traha hunto pa logra vision economico di  gobierno di Aruba.

Minister Besaril a keda satisfecho cu e evento y a desea Minister Plenipotenciario  Jorien Wuite tur clase di exito cu e evento na Sint Maarten 25 oktober proximo.

Comments

comments