Tur e reseñanan di e buki ARGUS na Belgica, Corsou y Hulanda, ta hopi positivo y ta refleha e aire di cambio necesario den nos estilo di skirbi poesia.

Diadomingo dia 8 di september ultimo tabatin den Podium Mozaiek na Amsterdam, presentacion di e buki ‘Argus’ di e autor Quito Nicolaas. Dilanti un publico hopi entusiasma, Franc Knipscheer a anuncia e nacrmento di e obra ARGUS. Primeramente a pasa un video di Dr. Sara Florian di Universidad di Sorbonne, kende a skirbi e introduccion di e buki y a duna su opinion tocante e obra aki.

Dr. Florian ta compara e poesianan di Quito Nicolaas cu poetanan di taya mayor, manera e.o. Rubén Dario y Fernando Pesoa. Y den otro casonan ta compara su poesianan cu esnan di e poeta Caribense, ganado di e premio Nobel di Literatura, Derek Walcott. E poeta Arubiano, kende tin 29 aña den e bida literario, a sa di a crea un propio estilo y cada biaha ta sorpresa su publico cu algo nobo.

E biaha aki un di poesianan cu a causa mas reaccion ta ‘De wereld ‘s nachts’/ e mundo den oranan di madruga. Den e poesia epico aki e ta trata e bida nocturno for di 12’or am te 05.00 am den e ciudadnan Bombay (India), Basra (Irak), Lima(Peru), Oranjestad (Aruba) y Amsterdam( Hulanda). Cinco pais den diferente continente cu cada ciudad cu un clima cultural distinto. Alabes e ta ilustra hopi mes den su texto cu solamente e actitud di e hendenan.

Argus ta e ultimo tomo di poesia cu e autor a skirbi y cual a keda publica. E tomo aki ta contene seis ciclo y un cantidad di poesianan cu ta refleha e bida di un persona. Den esaki constantemente e personahe den su poesianan ta refleha den pasado y wak den futuro. Y den esey e sentimentonanan, contra-soñonan, pensamentonan, combersacion, monologo y despedida ta intercambia cu otro y cristalisa den algo nobo.

E tomo aki cu poesianan na Hulandes y traduci na Ingles a ricibi te aworaki un bon acogida e.o. na Belgica, Hulanda y den Caribe. Brede Kristensen por ehempel a cualifica e autor Nicolaas como un poeta cu ta skirbi diferente for di poetanan di e islanan ABC, diferente for di esnan den e region di Caribe y hasta diferente cu esnan den Reino Hulandes. Na Belgica e reseña ta papia di poesianan sin un accento colonial. Y na Hulanda mes Ko van Geemert a opina: Esaki ta un tomo di poesia di un autor Caribense di peso.

Comments

comments