Despues di dos aña sin cu por celebra Arubadag, door di e pandemia di Coronavirus, hopi ta e expectativanan pa un celebracion di Arubadag na Hulanda un biaha mas. Minister Plenipotenciario di Aruba, mr. Ady Thijsen, a cuminsa na bisa cu ainda no tin un decision concreto ariba esaki. Pero lo bay informa pueblo di Aruba riba esaki, ya cu nan tarea ta di informa.
Pa loke ta Arubadag, e mandatario a indica cu e no sa di nada di esey, ya cu ta apenas el a yega Aruba. Arubadag tin un comision cu ta trahando riba esaki. Si e ta para pa visibilidad, cu Aruba mester ta visibel na Hulanda, unda cu e mester mustra cu e tin un bon relacion cu Reino Hulandes.
ARUBADAG
Tabata riba 6 di juni 1976, cu e prome Arubadag a tuma luga na Hulanda, ora c’un grupo di Arubiano bou di guia di Rosinda “Dechi” Langedijk – Thijssen (cu tabata tambe e fundado di “Vereninging Aruba Isla di Oro”) cu a tuma e iniciativa pa organisa e prome Arubadag. Danki na hopi otro Arubiano cu na 1982 a cuminsa bek cu e celebracion di Arubadag y danki e input di Arubahuis cu den e siguiente añanan cu a hinca hopi energia den organis’e, cu e Arubianonan awendia na Hulanda por celebra nan mesun “Dia di Himno y Bandera”. Of simplemente Arubadag!
ARUBADAG PRE-PANDEMIA
Tur aña varios mandatario como tambe varios agrupacion musical, cantante local tabata subi avion bay Hulanda pa asina celebra Arubadag na Hulanda. Sigur un dia cu hopi di nos hendenan residencia na Hulanda tabata anticipa. No por laga afo e monarcanan di Carnaval, tanto reina como tambe e ganadonan di Tumba y Calypso & Roadmarch (actual Soca Monarch) tabata bay Hulanda pa asina e comunidad Arubiano/Antiano na Hulanda por sinti tambe e ambiente di Carnaval, cu por bisa tabata e ‘highlight’ di e anochi.
2020-2022
Pero tur cos a cambia na 2020, ora cu cu mundo henter a para keto na momento cu e pandemia di Coronavirus a bira conoci y cuminsa plama rond mundo. Y asina tambe tur actividad a para. Incluso, Arubadag. Minister Plenipotenciario di e tempo ey, Guilfred Besaril a informa cu a cancela e celebracion di Arubadag den su formato di antes. Hasta por bisa cu e celebracion en conexion di 35 aña di Aruba su Status Aparte y 45 aña cu a hisa bandera di Aruba pa prome biaha, tampoco a bay door.
2023
Awo comunidad di Aruba y e comunidad Arubiano/Antiano na Hulanda ta en espera si e aña aki si Arubadag lo continua.
