Minister di Enseñansa Rudy Lampe a bisa cu no solamente den e encuentro cu mayornan a logra yega na un acuerdo riba un di nan preocupacionnan, pero tambe el a haya chens pa splica nan cu no ta bay pa capricho.
El a splica nan cu pais Aruba ta mara na e tratado di Derechonan Humano y e siman aki a keda publica e caso di un mucha special di Spaña cu a dura casi 10 aña y finalmente a bini un resolucion. Si e Minister kier of no, e mester cumpli cu e derecho di e mucha special riba educacion. Den e caso aki a haya chens di splica nan cu si e studiante caba scol primario di Paso Pa Futuro, e tin derecho pa move pa scol secundario.
E no por keda na un scol primario. Haciendo esaki, wantand’e na e scol e instituto a comete un fout y a pone Aruba den un problema internacional. Spaña ta haya un boet financiero door di no cumpli cu e tratado aki. “Cualkier Gobierno cu sinta, Aruba ta mara na e tratado internacional aki. No por tin un 7de klas na Paso Pa Futuro. A bisa nan cu no ta crea un 7de klas. Emma School ni Scol Caiquetia no tin’e. Nan a cumpli pero e scol aki no kier a cumpli.”
E resolucion tambe ta bisa cu ora un mayor bisa cu e kier pa su yiu keda na un scol regular, Nacionnan Uni ta bisa cu no ta aparta e muchanan aki na un otro luga, separa di e otro. Si e mucha ta na un scol regular mes, p.e. down sindrome, no por kit’e for di eynan y mand’e un scol special. E tin derecho pa e keda na e scol regular, si e mayor kier esey. Ta premira cu scolnan special ta bay bira menos y tin di haber cu e hecho cu mayornan ta scoge pa nan yiunan bay scol regular.
El a bisa tambe cu e tin deber pa cuida placa di pueblo. Si tin un edificio grandi lo pone un scol grandi eynan y si tin un scol chikito, ta pone den un edificio chikito, un manera eficiente pa anda cu e medionan financiero cu tin. Awo a yega na un acuerdo pa laga nan eynan mientras cu ta traha riba un alternativa.
Door di e resolucion di Nacionnan Uni el a trata di mustra e mayornan cu nan yiunan tin derecho pa bay enseñansa secundario. Un mayor a mand’e un carta y el a conteste. Esey ta e unico contacto cu e tabatin directo cu un mayor y a bise cu no por stroba su yiu di pasa pa otro scol.
