Tabata e propio Minister di Enseñansa Rudy Lampe, kende den conferencia di prensa a haci e anuncio aki. Diahuebs, 15 di augustus, 2019, ta e fecha riba cual scolnan (mayoria) ta habri nan porta pa e aña escolar nobo. Pero awo ta e propio mandatario cu ta bin dilanti pa bisa cu tin scolnan cu tin problema pa cuminsa diahuebs awo.
E mandatario ta bisa cu tin hopi cos cu no ta den man di Gobierno. Asina por ehempel, nan ta uza hopi trailer cu a wordo desaproba pa cual a duna ordo na e doño pa drecha nan. “Pero si nan no haci esaki na tempo, no ta nos culpa,” Lampe a bisa. Na diferente scol ta trahando den fin di siman pa por keda cla. Asina el a menciona scol manera Beatrix School (Dakota), cu ta parti den dos area. Si no keda cla pa diahuebs, mayornan lo wordo avisa.
Tin scol Dorna Sol na Burubundu, unda tin e Modulars nobo ta pone caba. Pero pa diahuebs no ta keda cla pa ricibi e studiantenan. E dos kleuterschoolnan cu a wordo uni (Pieter Boer y Fontein) na Fontein, tampoco ta cla. Nan ta spera cu finalisa di verf e modulars pa e siman aki. Otro scol cu no ta cla ta Colegio San Nicolas, ya cu tres lokaal (di e parti di IBISA) no ta cla. E dependance na Centro Bario Dakota, pa HAVO, tampoco ta cla. Tin diferente trabou mester finalsia y lesnan lo cuminsa eynan te dialuna otro siman. Tene cuenta cu esaki ta e dependance di Colegio San Nicolas cu ta ba CBD.
Na Santa Cruz tambe tin problema. Ta parce cu Depto di Gobierno of Departamento di Enseñansa no a controla e trabou pasobra ta apenas e doño ta moviendo e trailernan cu tin na SPO y cu a wordo desaproba despues cu basta alumno a bira malo. E mandatario a bisa “ta te awo nos a yega na un acuerdo pa nan move esakinan. Nos ta preparando lokaalnan pa start e aña escolar nobo na SPO na Sta Cruz.”
E trabounan na Emmaschool cu tin ciclo basico di Colegio Aruba tampoco no ta cla cu e dak cu mester wordo drecha.
Minister di Enseñansa cu tur e problemanan aki ta debi na e estado cu nan a haya e luganan aki na 2017.
