Parlamento a manda yama Minister Andin Bikker aden

A base regular e comision fiho di Parlamento encarga cu asuntonan di husticia, ta reuni cu Minister di Husticia mr. Andin Bikker. Den cuadro di e ultimo desaroyonan, Parlamentario Rocco Tjon MBA, a convoca un reunion diahuebs venidero. Lo elabora riba diferente topico, pero muy specifico lo trata e diferente reorganisacionnan cu ta andando manera esun di Cuerpo Especial Arubano, Migracion, Instituto Correcional Nacional (KIA) y Warda Nos Costa. Tambe lo elabora riba desaroyo di proyectonan y riba Insituto Coreccional Nacional.

REQUEST FOR EXPRESSION OF INTEREST
Actualmente tin dos proceso andando pa explora si tin interesadonan pa (1) construi un Instituto Coreccional nobo y (2) ehecuta un proyecto piloto di supervision electronico pa detenidonan. Respectivamente fin di September y fin di Augustus e dos procesonan aki mester termina segun e informacion den e dos “requests for expression”.

Lider di Fraccion di MEP den Parlamento, Rocco Tjon, cu den su prome salida como politico a logra 1213 voto individual riba su nomber. E tin mucho mas sosten politico den comunidad cu Minister Bikker, cu den ultimo eleccion a haya apenas 1086 voto personal.

Pa loke ta e proyecto piloto di supervision electronico, esaki lo tin implicacion pa cu e procesonan di trabou na K.I.A. y C.E.A. P’esey entre otro ta asina importante pa e “formatierapporten” di ambos organisacion por wordo formalisa.

PA CONCLUI
Un reorganisacion semper tin implicacion financiero y p’esey ta importante pa sa di Minister si mester di mas fondo pa ehecuta su intencionnan menciona. “Di nos banda nos lo sostene sigur si mester realoca fondo di un otro Ministerio pa garantisa seguridad. Na mes momento tambe ta importante pa wak y debati posibel consecuencianan legal y financiero y tambe delibera riba e pasonan necesario cu mester tuma den husticia”, asina lider di fraccion di MEP den Parlamento, Rocco Tjon, a termina bisando.