Manera nos a trece dilanti algun dia pasa, Ministerio di Asuntonan Economico, Comunicacion y Desaroyo Sostenibel por medio di Minister Geoffrey Wever lo presenta na e LGO-EU Forum na Brussels, cual ta tumando luga for di 26 te cu 29 di februari. Esaki dus ta e di 20 conferencia ministerial di e paisnan y teritorionan ultramarino di Union Europeo. Henter un delegacion representando Aruba a bay cu e meta pa firma un acuerdo a base di cual Aruba lo ricibi 14 miyon di Euro destina pa financia e implementacion di e programa E-Government Aruba.
Mark-Benson Denz a combersa cu minister Wever aya na Hulanda kende a conta un poco riba con a bay cu e prome dia, dunando tambe su antesala riba kico por spera. E mandatario ta splica cu e prome dia a cuminsa cu un reunion caminda a haci cierto preparacionnan pa e firmamento. Despues a sigui over pa e reunion ministerial di OCTA (Overseas Countries and Territories) cu Aruba ta forma parti di dje pa medio di relacion cu Union Europeo. Tabata tin diferente parti formal manera presentacion di presupuesto cual Aruba ta responsabel p’e, diferente presentacion y palabracion haci.
A bini tambe presentacion di fondonan unda cu uno interesante a resalta segun Minister Wever di 23 miyon euro cu e ta haya Aruba mester purba haya acceso na dje. Nan a haya splicacion con e ta funciona y Minister Wever mes a papia cu e personanan encarga cu e maneho despues di e reunion tambe. Minister Wever: “Ta 23 miyon euro cu por otorga den 200 diferente tipo di proyecto, mi ta kere ta oportunidadnan interesante. E idea ta pa nos formalisa e relacion ey y nos por guia esunnan na Aruba cu kier aplica p’e tipo di fondonan aki, hopi enfoca si na bio diversidad, sostenibilidad. Dus lo tin di wak cua tipo di proyecto por bini dilanti y yuda esunnan di Aruba cu ta interesa pa aplica p’esaki.”
Diahuebs ta firma e acuerdo, un dia importante y un bunita momento segun minister Wever. E proyecto di E-Government a keda desaroya bao di Gabinete Wever-Croes I y ta uno importante pasobra e mundo cada bes ta bira mas digital. “Nos kier un gobierno mas accesibel, mas eficiente, na un momento unda bo sistema ta mas integra y bo por tin ful un aparato cu ta ofrece servicionan na publico den un forma mucho mas digital y eficiente, mi ta kere ta un paso hopi grandi.”
